ઐતિહાસિક દાંડી ખાતે ગુજરાત ટુરિઝમના ઉપક્રમે ગાંધી જયંતિ મહોત્સવ-૨૦૨૬ની ઉજવણી

મંત્રી નરેશભાઈ પટેલે ગાંધીજીના વિચારો નવી પેઢી સુધી પહોંચાડવા પર ભાર મૂક્યો; ભાવિન શાસ્ત્રીની સંગીતમય રજૂઆતોએ શ્રોતાઓને મંત્રમુગ્ધ કર્યા

નવસારી : ગુજરાત ટુરિઝમના ઉપક્રમે મહાત્મા ગાંધીજીની જન્મજયંતિ નિમિત્તે જલાલપોર તાલુકાના ઐતિહાસિક દાંડી ખાતે ગાંધી જયંતિ મહોત્સવ-૨૦૨૬ની ભવ્ય ઉજવણી કરવામાં આવી હતી. આદિજાતિ વિકાસ મંત્રી નરેશભાઈ પટેલની ઉપસ્થિતિમાં દીપ પ્રાગટ્ય કરીને કાર્યક્રમનો પ્રારંભ કરવામાં આવ્યો હતો.

આ પ્રસંગે મંત્રી નરેશભાઈ પટેલે જણાવ્યું હતું કે પૂજ્ય મહાત્મા ગાંધીજીનું પ્રેરણાદાયી જીવન અને દેશની આઝાદીની લડતમાં તેમનું અમૂલ્ય યોગદાન સમગ્ર દેશ માટે હંમેશાં પ્રેરણારૂપ રહેશે. ગાંધીજીએ સત્ય, અહિંસા અને સ્વદેશીના વિચારોના માધ્યમથી દેશવાસીઓને એકત્રિત કરી અંગ્રેજ શાસન સામે જનઆંદોલન ઊભું કર્યું હતું. ઐતિહાસિક દાંડીકૂચ ભારતીય સ્વાતંત્ર્ય સંગ્રામની મહત્વપૂર્ણ ઘટના બની રહી છે.

તેમણે વધુમાં જણાવ્યું હતું કે ગાંધીજીના વિચારો અને જીવનમૂલ્યોને નવી પેઢી સુધી પહોંચાડવા માટે આવા કાર્યક્રમો મહત્વપૂર્ણ છે. સ્વદેશી વસ્તુઓનો ઉપયોગ, સ્વચ્છતા પ્રત્યેની જાગૃતિ, સ્થાનિક કારીગરો અને કુટિર ઉદ્યોગોને પ્રોત્સાહન તથા આત્મનિર્ભરતાનો સંદેશ ગાંધીજીના જીવનમાંથી મળે છે. તેમની જીવનશૈલી અને વિચારો આવનારી પેઢી માટે પથદર્શક બની રહેશે.

ગાંધી જયંતિ મહોત્સવના ભાગરૂપે યોજાયેલી મ્યુઝિકલ નાઇટમાં જાણીતા કલાકાર ભાવિન શાસ્ત્રીએ સંગીતમય રજૂઆતો કરીને ઉપસ્થિત શ્રોતાઓને મંત્રમુગ્ધ કર્યા હતા. તેમની વિવિધ રજૂઆતોને જનમેદનીએ ઉત્સાહપૂર્વક વધાવી હતી. સમગ્ર કાર્યક્રમ દરમિયાન દાંડી ખાતે આનંદમય માહોલ જોવા મળ્યો હતો.

આ મહોત્સવમાં જલાલપોરના ધારાસભ્ય આર.સી. પટેલ, નવસારીના ધારાસભ્ય રાકેશભાઈ દેસાઈ, જલાલપોર મામલતદાર મૃણાલદાન ઇસરાની, કાળુભાઈ ડાંગર સહિત અધિકારીઓ, પદાધિકારીઓ તથા મોટી સંખ્યામાં ગ્રામજનો ઉપસ્થિત રહ્યા હતા.