નવસારીના ગાંધીસ્મૃતિ રેલવે ઓવરબ્રિજ પાસેનો સર્વિસ રોડ બિસ્માર, વાહનચાલકોને હાલાકી

કામ માટે ખોદાયેલો સર્વિસ રોડ પુનઃ બનાવાયો નહીં; ધૂળ અને ઉબડખાબડ રસ્તાથી અકસ્માતનો ભય, મનપા સમારકામ કરે તેવી માંગ

નવસારી : નવસારીના ગાંધીસ્મૃતિ રેલવે ઓવરબ્રિજની બંને બાજુ આવેલા સર્વિસ રોડ લાંબા સમયથી બિસ્માર હાલતમાં હોવાથી વાહનચાલકોને ભારે મુશ્કેલીનો સામનો કરવો પડી રહ્યો છે. કામ માટે ખોદવામાં આવેલા રોડનું કામ પૂર્ણ થયા બાદ પુનઃ નિર્માણ કરવામાં આવ્યું નથી. ત્યારે નવસારી મહાનગરપાલિકા સર્વિસ રોડને વ્યવસ્થિત બનાવે તેવી માંગ ઉઠી છે.

છાપરા ચોકડીથી એરૂ ચાર રસ્તા સુધીના માર્ગ પર ગાંધીસ્મૃતિ રેલવે સ્ટેશન નજીક રેલવે લાઇન પસાર થાય છે. અગાઉ રેલવે ફાટક લાંબા સમય સુધી બંધ રહેતાં વાહનચાલકોનો સમય અને ઇંધણ વેડફાતાં હતાં. આ સમસ્યાના નિવારણ માટે નવસારી જિલ્લા પંચાયત દ્વારા ગાંધીસ્મૃતિ રેલવે સ્ટેશન પાસે ઓવરબ્રિજ બનાવવામાં આવ્યો હતો. તેનો એક છેડો હાંસાપોર-મંદિર ગામ તરફ પણ ઉતારવામાં આવ્યો હતો.

ત્યારબાદ ઇટાળવા, દાંતેજ, છાપરા, એરૂ સહિતનાં ગામોને પાલિકા વિસ્તારમાં સમાવી નવસારી મહાનગરપાલિકાની રચના કરવામાં આવી હતી. આથી ગાંધીસ્મૃતિ રેલવે ઓવરબ્રિજની જવાબદારી પણ નવસારી મનપા હેઠળ આવી હતી.

ઓવરબ્રિજ બન્યા બાદ બનાવવામાં આવેલા સર્વિસ રોડનો ઉપયોગ વાહનચાલકો ગાંધીસ્મૃતિથી મંકોડિયા સુધીના રિંગરોડ તરફ જવા માટે કરે છે. તેથી આ માર્ગ પર વાહનોની અવરજવર વધુ રહે છે. જોકે ઘણા સમય અગાઉ કામ અર્થે સર્વિસ રોડ ખોદવામાં આવ્યો હતો. કામ પૂર્ણ થયા બાદ પણ ઓવરબ્રિજની બંને બાજુનો સર્વિસ રોડ ફરી બનાવવામાં આવ્યો નથી.

ચોમાસા દરમિયાન બિસ્માર રોડ પર કાદવ-કીચડ થતાં રસ્તો લપસણો બન્યો હતો, જેના કારણે વાહનચાલકોને અકસ્માતનો ભય સતાવતો હતો. હાલમાં વાહનો પસાર થતાં ધૂળની ડમરીઓ ઊડે છે અને પાછળ આવતા વાહનચાલકોને મુશ્કેલી પડે છે. ઉબડખાબડ રસ્તાના કારણે વાહન પર નિયંત્રણ જાળવવામાં પણ તકલીફ પડતી હોવાથી અકસ્માતનું જોખમ રહે છે.

નવસારી મહાનગરપાલિકાના ઉચ્ચ અધિકારીઓ આ સમસ્યાને ધ્યાને લઈ ઓવરબ્રિજની બંને બાજુના સર્વિસ રોડનું યોગ્ય સમારકામ કરાવે તેવી વાહનચાલકોની માંગ છે.

સ્ટ્રીટ લાઇટોની ચકાસણી અને રખડતાં ઢોરોનો ઉપદ્રવ દૂર કરવાની માંગ

ગાંધીસ્મૃતિ રેલવે ઓવરબ્રિજ પર રાત્રિ દરમિયાન વાહનચાલકો અને રાહદારીઓને અવરજવરમાં મુશ્કેલી ન પડે તે માટે સ્ટ્રીટ લાઇટો લગાવવામાં આવી છે. જોકે ઘણી વખત ખામીના કારણે લાઇટો બંધ રહેતાં લોકોને હાલાકી પડે છે.

આ ઉપરાંત ઓવરબ્રિજ પર રસ્તાની વચ્ચોવચ રખડતાં ઢોરો બેસી જતાં હોવાથી અકસ્માતનો ભય રહે છે. મનપા સ્ટ્રીટ લાઇટોની નિયમિત ચકાસણી કરે અને રખડતાં ઢોરોને ઓવરબ્રિજ પર આવતાં રોકવા પગલાં ભરે તેવી વાહનચાલકોની માંગ છે.