નવસારી સાયબર ક્રાઇમની ચેતવણી : ગરબા પાસના નામે આવતી એપીકે ફાઇલોથી સાવધાન

નકલી પાસ અને ડિસ્કાઉન્ટ કૂપનની લાલચ આપી સાયબર ઠગો નાણાકીય નુકસાન પહોંચાડી શકે છે; અધિકૃત માધ્યમથી જ પાસ ખરીદવા અપીલ

નવસારી : નવરાત્રિ દરમિયાન ગરબાના ડિજિટલ પાસનો વધતો ઉપયોગ સાયબર ઠગો માટે ઠગાઈનું નવું માધ્યમ બની રહ્યો છે. નવસારી સાયબર ક્રાઇમે નાગરિકોને વોટ્સએપ અને સોશિયલ મીડિયા પર ગરબા પાસ, ડિસ્કાઉન્ટ કૂપન કે સસ્તા પાસના નામે મોકલાતી શંકાસ્પદ એપીકે ફાઇલોથી સાવધાન રહેવા ચેતવણી આપી છે.

સાયબર ઠગો સોશિયલ મીડિયા પર સસ્તા દરે ગરબા પાસ આપવાની લાલચ આપી લોકોને નકલી વેબસાઇટ કે લિંક પર લઈ જાય છે. કેટલાક કિસ્સામાં નકલી ડિજિટલ પાસના નામે ઓનલાઈન પેમેન્ટ કરાવી લેવામાં આવે છે, પરંતુ સ્થળ પર પહોંચ્યા બાદ પાસ માન્ય ન હોવાનું સામે આવે છે.

બીજી તરફ, વોટ્સએપ પર ગરબા પાસ અથવા ડિસ્કાઉન્ટ કૂપનના નામે એપીકે ફાઇલ મોકલી લોકોને તે ઇન્સ્ટોલ કરવા પ્રેરિત કરવામાં આવે છે. આવી શંકાસ્પદ એપ્લિકેશન ઇન્સ્ટોલ કરવાથી મોબાઇલની સંવેદનશીલ માહિતી અને વિવિધ એકાઉન્ટ્સ જોખમમાં મુકાઈ શકે છે. સાયબર ઠગો વોટ્સએપ, યુપીઆઈ તથા ઇન્ટરનેટ બેન્કિંગ સાથે જોડાયેલી માહિતીનો દુરુપયોગ કરી નાણાકીય નુકસાન પહોંચાડી શકે છે.

નવસારી સાયબર ક્રાઇમના પીઆઈ ઉમંગ મોદીએ નાગરિકોને સાવચેતી રાખવા અપીલ કરી છે. ગરબા પાસ હંમેશાં આયોજકના અધિકૃત કાઉન્ટર અથવા સત્તાવાર વેબસાઇટ પરથી જ ખરીદવા જણાવાયું છે. સાથે જ વોટ્સએપ પર મળતી અજાણી લિંક પર ક્લિક ન કરવા, અજાણ્યા ક્યુઆર કોડ સ્કેન ન કરવા અને શંકાસ્પદ એપીકે ફાઇલ ઇન્સ્ટોલ ન કરવા સૂચના આપવામાં આવી છે.

ઈ-ત્રિશૂલ એપથી લિંક અને ક્યુઆર કોડની ચકાસણી

નાગરિકોને સાયબર ઠગાઈથી બચાવવા નવસારી પોલીસ દ્વારા ‘ઈ-ત્રિશૂલ’ નામની મોબાઇલ સિક્યુરિટી એપ્લિકેશન વિકસાવવામાં આવી હોવાનું જણાવાયું છે. આ એપ ગૂગલ પ્લે સ્ટોર પર ઉપલબ્ધ હોવાનું પણ જણાવાયું છે.

એપ્લિકેશનની મદદથી મોબાઇલમાં રહેલી એપ્સની સુરક્ષા અંગે માહિતી મેળવી શકાય છે. ઉપરાંત, ઓનલાઈન પાસ ખરીદવાના માધ્યમો, શંકાસ્પદ લિંક્સ અને ક્યુઆર કોડની ચકાસણી કરવામાં પણ મદદ મળે છે.

નવરાત્રિ દરમિયાન ઓનલાઈન વ્યવહારો વધતા નાગરિકોને સાવચેતી રાખવા તથા અજાણી એપ્લિકેશન કે લિંકનો ઉપયોગ કરતાં પહેલાં તેની વિશ્વસનીયતા ચકાસવા અપીલ કરવામાં આવી છે.