નવસારીમાં ગંદકી કરનારા ૩ દુકાનદારો દંડાયા, ૨ સેનેટરી સબ ઇન્સ્પેક્ટર સામે શિસ્તભંગની કાર્યવાહીના આદેશ

મ્યુનિસિપલ કમિશનર જયેશ ઉપાધ્યાયે રાત્રે કચરો જમા થતો હોય તેવાં સ્થળોની આકસ્મિક તપાસ કરી; સીસીટીવીથી ૨૪ કલાક દેખરેખ રાખવા સૂચના

નવસારી : ‘સ્વચ્છતા હી સેવા’ અભિયાન અંતર્ગત નવસારી મહાનગરપાલિકાના મ્યુનિસિપલ કમિશનર જયેશ ઉપાધ્યાયે શહેરમાં વારંવાર કચરો ફેંકવામાં આવતો હોય તેવાં સંવેદનશીલ સ્થળોની રાત્રિ દરમિયાન આકસ્મિક ચકાસણી કરી હતી. આ દરમિયાન ગંદકી કરનારા ૩ દુકાનદારો સામે દંડનીય કાર્યવાહી કરવામાં આવી હતી. સાથે જ ૨ સેનેટરી સબ ઇન્સ્પેક્ટર સામે શિસ્તભંગની કાર્યવાહી કરવાના આદેશ આપવામાં આવ્યા હતા.

સમગ્ર રાજ્યમાં ચાલી રહેલા ‘સ્વચ્છતા હી સેવા’ અભિયાન અંતર્ગત નવસારી મહાનગરપાલિકા દ્વારા શહેરને કચરામુક્ત અને સ્વચ્છ બનાવવા સઘન કામગીરી હાથ ધરવામાં આવી રહી છે. આ ઝુંબેશના ભાગરૂપે કમિશનરે ગત રાત્રે વિવિધ વિસ્તારોની રૂબરૂ મુલાકાત લઈ કચરાના નિકાલ અને સફાઈ વ્યવસ્થાની વાસ્તવિક સ્થિતિનું નિરીક્ષણ કર્યું હતું. તેમણે નગરજનોને સ્વચ્છતા જાળવવા પ્રેરિત પણ કર્યા હતા.

નિરીક્ષણ દરમિયાન દૂધિયા તળાવ શાકભાજી માર્કેટ, શાંતાદેવી રોડ, વિજલપોર શાકભાજી માર્કેટ તેમજ મોડી રાત સુધી કાર્યરત વિવિધ ફૂડ કોર્ટ વિસ્તારોની મુલાકાત લેવામાં આવી હતી. કમિશનર સાથે નાયબ મ્યુનિસિપલ કમિશનર ગૌરાંગ વસાણી, ઘન કચરા વ્યવસ્થાપન તથા આરોગ્ય વિભાગના અધિકારીઓ, સુપરવાઇઝર, સેનેટરી ઇન્સ્પેક્ટર અને સેનેટરી સબ ઇન્સ્પેક્ટર સહિતના કર્મચારીઓ ઉપસ્થિત રહ્યા હતા.

મુલાકાત દરમિયાન કમિશનરે જાહેર રસ્તાઓ અને ફૂટપાથ પર ખુલ્લામાં કચરો ફેંકતા વેપારીઓ તથા નાગરિકો સામે કડક કાર્યવાહી કરવા સૂચના આપી હતી. વારંવાર કચરો જમા થતો હોય તેવાં સંવેદનશીલ સ્થળો પર સીસીટીવી કેમેરા દ્વારા ૨૪ કલાક દેખરેખ ગોઠવવા અને જરૂર જણાય ત્યાં સુરક્ષા કર્મચારીઓ મૂકવા પણ સૂચના આપવામાં આવી હતી.

જાહેર માર્ગો પર કચરો, એંઠવાડ કે પ્લાસ્ટિક ફેંકનારા દુકાનદારો, લારી-ગલ્લાધારકો તથા અન્ય વ્યક્તિઓ સામે કોઈપણ પ્રકારની શેહશરમ રાખ્યા વિના તાત્કાલિક કાર્યવાહી કરવા કમિશનરે સંબંધિત અધિકારીઓને કડક સૂચનાઓ આપી હતી.