ભુવાનગરી તરીકે જાણીતા નવસારીમાં વધુ એક ભૂવો પડ્યો

નવસારી કલેકટર કચેરી-પ્રાંત કચેરી સામેના મુખ્ય રસ્તા પર ભૂવો પડ્યો, બેરીકેટ મૂકી જગ્યા બ્લોક કરાઈ

નવસારી : ભુવાનગરી તરીકે જાણીતા નવસારીમાં વધુ એક ભૂવો પડવાની ઘટના સામે આવી છે. આ વખતે તો ભૂવો નવસારી કલેકટર-પ્રાંત કચેરી સામેથી પસાર થતા મુખ્ય રસ્તા પર જ પડ્યો છે. જોકે બેરીકેટ મૂકી જગ્યા બ્લોક કરવામાં આવી છે.

નવસારી શહેર ભુવાનગરી તરીકે ઓળખાઈ રહ્યું છે. ચોમાસા દરમિયાન નવસારી શહેરના વિવિધ વિસ્તારોમાં ભૂવાઓ પડવાની ઘટનાઓ બને છે. પહેલા તો ખાસ કરીને નવસારી પશ્ચિમ ભાગે આવેલા જલાલપોર રોડ પર ભૂવાઓ પડતા હતા. પરંતુ હવે નવસારી પૂર્વ ભાગના વિવિધ વિસ્તારોમાં પણ ભૂવાઓ પડે છે.

નવસારીમાં જુનાથાણાથી કાલીયાવાડી થઈ ગ્રીડ તરફ જવા માટે મુખ્ય રસ્તો પસાર થાય છે. આ રસ્તા પરથી રોજબરોજ લાખો નાના-મોટા વાહનો, ટ્રકો, ટેમ્પા, એસ.ટી. બસ સહિતના વાહનો પસાર થાય છે. કાલીયાવાડી પાસેના મુખ્ય રસ્તાને અડીને એક તરફ કલેકટર કચેરી અને બીજી તરફ પ્રાંત કચેરી આવેલી છે. જિલ્લા કક્ષાની કચેરી હોવાથી રોજ હજારો અરજદારો અહીં આવે છે. ત્યારે જુનાથાણાથી કાલીયાવાડી થઈ ગ્રીડ સુધીનો રસ્તો નવસારીના સૌથી વ્યસ્ત રસ્તાઓ પૈકીનો એક છે.

આજે કાલીયાવાડી સ્થિત કલેકટર-પ્રાંત કચેરી સામેથી પસાર થતા મુખ્ય રસ્તા પર ભૂવો પડવાની ઘટના બની હતી. જેથી ભૂવો પડેલી જગ્યાએ બેરીકેટ અને ઝાડની ડાળીઓ મૂકી તે જગ્યા બ્લોક કરવામાં આવી હતી.

ગ્રીડ પાસેથી નેશનલ હાઈવે નં. 48 પસાર થાય છે. બીજી તરફ વિરાવળ પૂર્ણા નદી પરનો ઓવરબ્રિજ મોટા-ભારે વાહનો માટે બંધ કરી દેવાયો છે. જેથી એસ.ટી. ડેપોની બસ અને અન્ય મોટા વાહનો જુનાથાણાથી કાલીયાવાડી થઈ ગ્રીડ હાઈવે પર જાય છે. ત્યારે નવસારીના સૌથી વ્યસ્ત રસ્તા પર ભૂવો પડવાની ઘટનાથી વાહનચાલકો અને રાહદારીઓમાં ભય સાથે ચિંતા જોવા મળી છે.

નવસારી મનપા વિસ્તારમાં ભૂવાઓ પડવાનું કારણ જાણવાને બદલે અગાઉ નવસારી મહાનગરપાલિકાના મેયર અશોકભાઈ ધોરાજીયાએ “ભૂવાઓ પડશે જ, સંયમ રાખજો” તેવું જણાવ્યું હતું. ત્યારે પાલિકાના અધિકારીઓની કામગીરી અને મેયરના જવાબથી શહેરની પ્રજામાં અસંતોષ જોવા મળ્યો છે.

મનપાના ઉચ્ચ અધિકારીઓને સોઈલ ટેસ્ટ રિપોર્ટની ખબર છે ખરી?

જુનાથાણાથી કાલીયાવાડી તરફના રસ્તા પર કલેકટર કચેરી પાસેનો બ્રિજ જર્જરિત થયો હોવાથી નવસારી મનપા દ્વારા કરોડોના ખર્ચે નવો બ્રિજ બનાવવા સાથે રસ્તો પણ બનાવ્યો હતો. નવસારીમાં રસ્તાની નીચેથી ડ્રેનેજ અને પીવાના પાણીની લાઈન પસાર થાય છે. ત્યાં નીચેની માટી ધસી જવાના કારણે ભૂવાઓ પડે છે. તો જુનાથાણાથી કાલીયાવાડી તરફના રસ્તાની વચ્ચેથી ખાડી પસાર થાય છે.

આ ખાડીમાં પૂરનાં પાણી આવવાથી આજુબાજુના વિસ્તારોમાં પાણી ભરાતા હોય છે. જેના લીધે રસ્તાની નીચેની માટી ધસી જવાની સંભાવના રહે છે. ત્યારે ભૂવા પડવાની ઘટનાથી બચવા માટે પહેલા સોઈલ ટેસ્ટનો રિપોર્ટ કરાવવાનો રહે છે, જેથી નીચેના ભાગની સક્ષમતા જાણી શકાય. ત્યારે મનપાના ઉચ્ચ અધિકારીઓને સોઈલ ટેસ્ટ રિપોર્ટની ખબર છે કે ખરી? જો સોઈલ ટેસ્ટ રિપોર્ટની જાણ છે તો શું ખાડી બ્રિજ અને રસ્તો બનાવવા પહેલા રિપોર્ટ કઢાવ્યો હશે કે કેમ?

રસ્તામાં પડતા ભૂવાના જવાબદાર મનપાના અધિકારીઓ કે કોન્ટ્રાકટર?

નવસારી મનપા દ્વારા શહેરમાં વિવિધ રસ્તાઓ બનાવવા માટે રોડ કોન્ટ્રાકટરોને કોન્ટ્રાક્ટ આપવામાં આવે છે. જેથી રોડ કોન્ટ્રાકટરો રસ્તો બનાવી દે છે, પરંતુ રસ્તાની ગુણવત્તા સહિતની ચકાસણી કરવાની જવાબદારી નવસારી મનપાના ઉચ્ચ અધિકારીઓની હોય છે. ત્યારબાદ જ તે રસ્તો શહેરીજનોના ઉપયોગ માટે ખુલ્લો મૂકવામાં આવે છે.

ત્યારે રસ્તામાં પડતા ભૂવાના જવાબદાર મનપાના અધિકારીઓ કે કોન્ટ્રાકટર છે તે સવાલ ઊભો થાય છે.