નવસારી બી.આર. ફાર્મ ખાતે જિલ્લાના 780 ટીબીના દર્દીઓને પોષણ કિટનું વિતરણ કરાયું

કેન્દ્રીય જળ શક્તિ મંત્રી સી.આર. પાટીલની ઉપસ્થિતિમાં ટીબી મુક્ત ભારત અભિયાન અંતર્ગત દર્દીઓના પોષણ અને આરોગ્ય માટે સંવેદનશીલ પહેલ

નવસારી : ટીબી મુક્ત ભારત અભિયાનને વધુ વેગ આપવા અને ટીબી રોગથી પીડિત દર્દીઓના આરોગ્ય તથા પોષણની કાળજી લેવાના સંવેદનશીલ પ્રયાસરૂપે આજે નવસારીના બી.આર. ફાર્મ ખાતે ટીબીના દર્દીઓને પોષણ કિટ વિતરણ કાર્યક્રમ યોજાયો હતો. આ કાર્યક્રમમાં કેન્દ્રીય જળ શક્તિ મંત્રી સી.આર. પાટીલની વિશેષ ઉપસ્થિતિ રહી હતી.

આ કાર્યક્રમમાં ગુજરાત સરકારના નાણાં વિભાગ તથા શહેરી વિકાસ અને શહેરી ગૃહ નિર્માણ વિભાગના કેબિનેટ મંત્રી કનુભાઈ દેસાઈ, આદિજાતિ વિકાસ, ખાદી, કુટિર ઉદ્યોગ અને ગ્રામોદ્યોગ વિભાગના કેબિનેટ મંત્રી નરેશભાઈ પટેલ, વલસાડના સાંસદ ધવલભાઈ પટેલ, નવસારી ધારાસભ્ય રાકેશભાઈ દેસાઈ, નવસારી જિલ્લા પંચાયત પ્રમુખ નિરાલીબેન નાયક, નવસારી જિલ્લા ભાજપ પ્રમુખ ભુરાભાઈ શાહ સહિતના મહાનુભાવો ઉપસ્થિત રહ્યા હતા.

આ પ્રસંગે નવસારી જિલ્લાના 780 ટીબી દર્દીઓને પોષણ કિટનું વિતરણ કરવામાં આવ્યું હતું. ટીબી સામેની લડતમાં નિયમિત અને સંપૂર્ણ સારવાર સાથે દર્દીઓને પૌષ્ટિક આહાર મળી રહે તે પણ ખૂબ જ મહત્વપૂર્ણ છે. દર્દીઓના સ્વાસ્થ્યને વધુ મજબૂત બનાવવા તથા સારવાર દરમિયાન જરૂરી પોષણ મળી રહે તે હેતુથી પોષણ કિટનું વિતરણ કરવામાં આવ્યું હતું.

ટીબી મુક્ત ભારતના સંકલ્પને સાકાર કરવા માટે સરકાર દ્વારા સારવારની સાથે દર્દીઓના પોષણ, જાગૃતિ અને સામાજિક સહભાગિતાને પણ મહત્વ આપવામાં આવી રહ્યું છે. ટીબી દર્દીઓ પ્રત્યે સમાજમાં સહાનુભૂતિ અને સહયોગની ભાવના વિકસે તેમજ દર્દીઓ સારવારનો સંપૂર્ણ કોર્સ પૂર્ણ કરી સ્વસ્થ જીવન તરફ આગળ વધે તે માટે આવા સંવેદનશીલ પ્રયાસો મહત્વપૂર્ણ સાબિત થાય છે.

ટીબી મુક્ત ભારત અભિયાનની સફળતા માટે સરકારી તંત્ર, સામાજિક સંસ્થાઓ, જનપ્રતિનિધિઓ અને નાગરિક સમાજના સંયુક્ત પ્રયાસો જરૂરી છે. નવસારી જિલ્લામાં પણ ટીબીના દર્દીઓની સારવાર સાથે તેમના પોષણ અને પુનઃસ્થાપનને પ્રાધાન્ય આપી ટીબી મુક્ત નવસારી અને ટીબી મુક્ત ભારતના સંકલ્પને સાકાર કરવાની દિશામાં સતત કામગીરી કરવામાં આવી રહી છે.