બીલીમોરામાં સમાજના રક્ષકોને રક્ષા સૂત્ર બાંધી રક્ષાબંધનની ઉજવણી કરાઈ

બીલીમોરા : રક્ષાબંધન પર્વ નિમિત્તે વિશ્વ હિન્દુ પરિષદ, બજરંગ દળ અને રાષ્ટ્રીય સ્વયંસેવક સંઘના યુવા કાર્યકરો દ્વારા અનોખી પહેલ કરવામાં આવી હતી.

કાર્યકરોએ બીલીમોરા પોલીસ વિભાગ, ફાયર વિભાગ તેમજ હોસ્પિટલમાં ફરજ બજાવતા કર્મચારીઓને રક્ષા સૂત્ર બાંધી તેમની નિષ્ઠા અને સેવાભાવનું સન્માન કર્યું હતું.

આ પ્રસંગે કાર્યકરોએ જણાવ્યું હતું કે, સમાજની સુરક્ષા અને સેવા માટે દિવસ-રાત ફરજ બજાવતા પોલીસકર્મીઓ, ફાયર જવાનો અને આરોગ્ય કર્મચારીઓ સાચા અર્થમાં સમાજના રક્ષક છે.

રક્ષાબંધનના પર્વે આવા કર્મયોગીઓ પ્રત્યે આદર અને કૃતજ્ઞતા વ્યક્ત કરવાનો આ પ્રયાસ કરવામાં આવ્યો હતો.

આ ઉજવણી દ્વારા રક્ષાબંધનના પર્વને ભાઈ-બહેનના સંબંધથી આગળ લઈ જઈ સમાજમાં સેવા, સુરક્ષા, એકતા અને સંસ્કારનો સંદેશ આપવામાં આવ્યો હતો.