રાત્રિના અંધકારમાં પશુઓ બનતા હતા અકસ્માતનું કારણ, બીલીમોરામાં શરૂ થઈ અનોખી સુરક્ષા પહેલ

બીલીમોરા : રાત્રિના સમયે શહેરના રસ્તાઓ પર ફરતા કે રસ્તાની વચ્ચે બેઠેલા પશુઓ ઘણી વખત વાહનચાલકોને અંધારાના કારણે સમયસર દેખાતા નથી. ખાસ કરીને હેડલાઇટના પ્રકાશમાં અચાનક પશુઓ સામે આવતાં વાહનચાલકો માટે અકસ્માત ટાળવો મુશ્કેલ બની જાય છે. આવી પરિસ્થિતિમાં પશુઓને પણ ઈજા થવાની સાથે વાહનચાલકો અને અન્ય લોકોના જીવ માટે પણ જોખમ ઊભું થાય છે. આ સમસ્યાને ધ્યાનમાં રાખીને બીલીમોરા પોલીસના સંકલનમાં મહાદેવ ગૌ સેવા ગ્રૂપ દ્વારા પશુઓની સુરક્ષા માટે અનોખી પહેલ શરૂ કરવામાં આવી છે.

મહાદેવ ગૌ સેવા ગ્રૂપના કાર્યકરો દ્વારા રસ્તા પર ફરતા ગૌવંશ તેમજ અન્ય પશુઓને શોધી તેમના ગળામાં રિફ્લેક્ટિવ-ગ્લો સેફટી બેલ્ટ પહેરાવવામાં આવી રહ્યા છે. આ બેલ્ટની ખાસિયત એ છે કે રાત્રિના સમયે વાહનની હેડલાઇટનો પ્રકાશ તેના પર પડતાં બેલ્ટ ચમકે છે. જેના કારણે અંધારામાં પણ વાહનચાલકોને રસ્તા પર રહેલા પશુઓ દૂરથી નજરે પડે અને તેઓ સમયસર વાહનની ઝડપ ઓછી કરી શકે છે.

આ પહેલનો હેતુ માત્ર ગૌવંશ અને પશુઓની સુરક્ષા કરવાનો નથી, પરંતુ ગૌવંશ અને માનવજીવન બંનેને અકસ્માતથી બચાવવાનો છે. બીલીમોરામાં શરૂ કરવામાં આવેલી આ પહેલ લોકોમાં માર્ગ સુરક્ષા અંગે જાગૃતિ ફેલાવવાની સાથે ગૌસેવાને પણ એક નવી દિશા આપે છે.