બીલીમોરા સ્ટેશન રોડ પર ગાદલા-તકિયાની દુકાનમાં વિકરાળ આગ લાગતાં અફરાતફરી

ગણતરીની મિનિટોમાં છ દુકાનો આગની ઝપેટમાં, લાખો રૂપિયાનું નુકસાન; પાંચ ફાયર બમ્બાની મદદથી કલાકોની જહેમત બાદ આગ કાબૂમાં

બીલીમોરા : બીલીમોરા રેલવે સ્ટેશન રોડ પર આવેલી એક ગાદલા-તકિયાની દુકાનમાં અચાનક આગ લાગતાં સ્થાનિકોમાં અફરાતફરીનો માહોલ સર્જાયો હતો. આ આગે જોતજોતામાં આજુબાજુની દુકાનોને પણ પોતાની ઝપેટમાં લેતાં છ દુકાનોમાં આગ પ્રસરી ગઈ હતી. બીલીમોરા અને ગણદેવી ફાયર વિભાગની ટીમોએ કલાકોની જહેમત બાદ આગ ઉપર કાબૂ મેળવ્યો હતો.

બીલીમોરા રેલવે સ્ટેશન રોડ પર વિવિધ ચીજવસ્તુઓનું વેચાણ કરતી ઘણી દુકાનો એક જ લાઇનમાં એકબીજાને અડીને આવેલી છે. આજે બપોરે અહીં આવેલી ગાદલા-તકિયાની દુકાનમાં અચાનક આગ લાગી હતી. આગ ધીમે-ધીમે વધતાં સ્થાનિકોમાં અફરાતફરી મચી ગઈ હતી અને બીલીમોરા ફાયર વિભાગને જાણ કરવામાં આવી હતી.

ફાયર વિભાગની ટીમ ઘટનાસ્થળે પહોંચે તે પહેલાં જ આગે વિકરાળ સ્વરૂપ ધારણ કરી લીધું હતું. આગ આજુબાજુની દુકાનોમાં પણ પ્રસરી જતાં સ્થાનિકોમાં ભયનો માહોલ સર્જાયો હતો અને દોડધામ મચી ગઈ હતી.

બીલીમોરા ફાયર વિભાગની ટીમ પાણીના બમ્બા સાથે ઘટનાસ્થળે પહોંચી આગ ઉપર પાણીનો મારો ચલાવ્યો હતો. પરંતુ આગ વધુ વિકરાળ હોવાથી ગણદેવી ફાયર વિભાગને પણ જાણ કરવામાં આવી હતી. ગણદેવી ફાયર વિભાગની ટીમે પણ ઘટનાસ્થળે પહોંચી આગ બુઝાવવાની કામગીરી હાથ ધરી હતી. બીલીમોરા ફાયર વિભાગના ચાર અને ગણદેવી ફાયર વિભાગના એક મળી કુલ પાંચ પાણીના બમ્બાની મદદથી કલાકોની જહેમત બાદ આખરે આગ કાબૂમાં આવી હતી.

આગ કાબૂમાં આવે તે પહેલાં ગાદલા-તકિયાની દુકાન તેમજ આજુબાજુની અન્ય દુકાનોમાં રહેલો સામાન બળીને ખાખ થઈ ગયો હતો. જેના કારણે વેપારીઓને લાખો રૂપિયાનું નુકસાન થયું હોવાનું જાણવા મળ્યું છે. સદનસીબે આ ઘટનામાં કોઈ જાનહાનિ ન થતાં તંત્રએ રાહતનો શ્વાસ લીધો હતો.

પ્રાથમિક તપાસમાં શોર્ટ સર્કિટના કારણે આગ લાગી હોવાની આશંકા વ્યક્ત કરવામાં આવી છે. આગનું ચોક્કસ કારણ જાણવા તંત્ર દ્વારા વધુ તપાસ હાથ ધરવામાં આવી છે.