ચાર વખત વાલીને બોલાવ્યા, છતાં LC આપ્યું નહીં!

વેદાંતી સ્કૂલ સામે ગંભીર સવાલો; બે નોટિસ છતાં શિક્ષણ તંત્રને જવાબ નહીં, વિદ્યાર્થીના ભવિષ્ય સાથે બેદરકારીનો આક્ષેપ

ડાંગ : ડાંગ જિલ્લાના મુખ્ય મથક આહવા ખાતે આવેલી વેદાંતી ઇંગ્લિશ મિડિયમ સ્કૂલનું શૈક્ષણિક કાર્ય બંધ થઈ ગયું હોવા વચ્ચે વિદ્યાર્થીના લિવિંગ સર્ટિફિકેટને લઈને વિવાદ ગંભીર બન્યો છે. વાલીની રજૂઆત બાદ શિક્ષણ તંત્ર દ્વારા શાળા સંચાલનને બે વખત નોટિસ આપવામાં આવી હોવા છતાં જવાબ ન મળ્યાનો સત્તાવાર પત્રમાં ઉલ્લેખ છે. બીજી તરફ વાલીનો આક્ષેપ છે કે તેમને ચાર વખત શાળામાં બોલાવવામાં આવ્યા, પરંતુ LC આપ્યા વગર પરત મોકલી દેવામાં આવ્યા.

આહવા તાલુકા પંચાયત શિક્ષણ શાખા દ્વારા તા. 07/09/2026ના રોજ શાળાના મુખ્ય શિક્ષક/ટ્રસ્ટીને નોટિસ પાઠવવામાં આવી હતી. નોટિસ મુજબ ધર્મભાઈ સદુભાઈ સહારે દ્વારા તેમના પુત્ર દેવાશુભાઈ ધર્મભાઈ સહારેનું લિવિંગ સર્ટિફિકેટ મેળવવા અરજી કરવામાં આવી હતી.

આ મામલે અગાઉ તા. 25/08/2026ના પત્ર ક્રમાંક 505 દ્વારા વિદ્યાર્થીનું LC તાત્કાલિક આપવા અને કરાયેલી કાર્યવાહી અંગે કચેરીને લેખિતમાં જાણ કરવા સૂચના આપવામાં આવી હતી. જોકે, બીજી નોટિસમાં જણાવ્યા મુજબ શાળા તરફથી કચેરીને લેખિત જવાબ આપવામાં આવ્યો નહોતો.

ત્યારબાદ તા. 07/09/2026ની નોટિસ દ્વારા શાળાના જવાબદાર વ્યક્તિને તા. 08/09/2026ના રોજ સવારે 11 વાગ્યે રૂબરૂ હાજર રહી લેખિત ખુલાસો આપવા જણાવાયું હતું.

વાલીના આક્ષેપ મુજબ LC મેળવવા માટે તેમને ચાર વખત શાળામાં બોલાવવામાં આવ્યા, છતાં દરેક વખતે પ્રમાણપત્ર આપ્યા વગર પરત મોકલવામાં આવ્યા હતા. જો આ આક્ષેપ સાચો હોય તો વિદ્યાર્થીને જરૂરી પ્રમાણપત્ર માટે વારંવાર શાળાના ધક્કા કેમ ખાવા પડ્યા તે અંગે સવાલો ઊભા થયા છે.

સત્તાવાર નોટિસમાં શિક્ષણ વિભાગની સૂચના છતાં શાળા સંચાલન તરફથી જવાબ ન મળ્યાનો ઉલ્લેખ થતાં સંચાલનની જવાબદારી અને વિદ્યાર્થીના હિત અંગે પણ પ્રશ્નો ઊભા થયા છે. આગળનું શિક્ષણ ચાલુ રાખવા LC જરૂરી હોય ત્યારે વિદ્યાર્થીને પ્રમાણપત્ર ક્યારે મળશે અને શિક્ષણ તંત્ર હવે શું પગલાં લેશે તે અંગે વાલી તરફથી સ્પષ્ટતા માંગવામાં આવી રહી છે.

સમગ્ર મામલે શિક્ષણ વિભાગ શાળા સંચાલન પાસેથી જવાબ મેળવી વિદ્યાર્થીના હિતમાં તાત્કાલિક નિર્ણય કરે અને LCની સમસ્યાનો અંત લાવે તેવી માંગ ઉઠી રહી છે.