ચીખલી સબ ડિસ્ટ્રિક્ટ હોસ્પિટલના લોકાર્પણના 12 દિવસ બાદ પણ માત્ર ઓપીડી અને કેસ બારી જ કાર્યરત

100 બેડની હોસ્પિટલમાં વોર્ડ અને કોલ્ડ સ્ટોરેજ સહિતની સુવિધાઓ શરૂ થવાની બાકી; અધૂરી કામગીરી વચ્ચે લોકાર્પણ સામે સવાલો

ચીખલી : ચીખલી સબ ડિસ્ટ્રિક્ટ હોસ્પિટલના 100 બેડની ક્ષમતાવાળા નવા બિલ્ડિંગનું લોકાર્પણ થયાના 12 દિવસ બાદ પણ માત્ર ઓપીડી વિભાગ અને કેસ બારી જ કાર્યરત કરવામાં આવી છે. મહત્વની સુવિધાઓ શરૂ થવાની બાકી હોવાથી આરોગ્ય વિભાગની કામગીરી સામે સવાલો ઊભા થયા છે.

ગત 19મી સપ્ટેમ્બરે 100 બેડની ક્ષમતા ધરાવતી ચીખલી સબ ડિસ્ટ્રિક્ટ હોસ્પિટલના નવા બિલ્ડિંગનું ધામધૂમથી લોકાર્પણ કરવામાં આવ્યું હતું. 46.53 લાખ રૂપિયાના ખર્ચે તૈયાર કરાયેલા નવા બિલ્ડિંગનું લોકાર્પણ કેન્દ્રીય જળશક્તિ મંત્રી સી.આર. પાટીલ, કેબિનેટ મંત્રી નરેશભાઈ તથા આરોગ્ય વિભાગના રાજ્યમંત્રી પ્રફુલ પાનસેરિયા દ્વારા કરવામાં આવ્યું હતું.

જિલ્લા તંત્ર દ્વારા મોટા ઉપાડે કરવામાં આવેલા લોકાર્પણ બાદ લોકોમાં નવી હોસ્પિટલની સંપૂર્ણ સુવિધાઓ શરૂ થવાની અપેક્ષા હતી. જોકે 12 દિવસ વીતી ગયા છતાં નવા બિલ્ડિંગમાં માત્ર કેસ બારી અને ઓપીડી વિભાગની કામગીરી જ શરૂ કરવામાં આવી હોવાનું સામે આવ્યું છે.

હોસ્પિટલમાં દર્દીઓ માટે અત્યંત જરૂરી ગણાતી વોર્ડની સુવિધા, કોલ્ડ સ્ટોરેજ સહિતની અન્ય વ્યવસ્થાઓ હજુ શરૂ થવાની બાકી હોવાનું જાણવા મળે છે. ત્યારે અધૂરી કામગીરી વચ્ચે લોકાર્પણ કરવાની ઉતાવળ શા માટે કરવામાં આવી તે અંગે સ્થાનિકોમાં સવાલો ઉઠી રહ્યા છે.

આ બાબતે સબ ડિસ્ટ્રિક્ટ હોસ્પિટલનાં ઇન્ચાર્જ અધિક્ષક ડૉ. માલતીબેન પટેલે જણાવ્યું હતું કે, નવા બિલ્ડિંગમાં હાલ કેસ બારી અને ઓપીડી શરૂ કરવામાં આવી છે. વોર્ડ, કોલ્ડ સ્ટોરેજ સહિતની અન્ય સુવિધાઓ એક-બે દિવસમાં શરૂ થઈ જશે.