ચીખલીના ફડવેલ સહિતનાં ગામોમાં વીજ ગ્રાહકોને 30 દિવસમાં વધારાની ડિપોઝિટ ભરવા સૂચના

ડીજીવીસીએલની સિક્યોરિટી ડિપોઝિટની નોટિસથી ગ્રાહકોમાં કચવાટ; વીજ વપરાશ અને જમા ડિપોઝિટના આધારે કરાયેલી ગણતરીની વિગતો આપવાની માંગ

ચીખલી : ચીખલી તાલુકાના રાનકૂવા સ્થિત ડીજીવીસીએલ સબ ડિવિઝન દ્વારા ફડવેલ સહિતનાં ગામોના કેટલાક વીજ ગ્રાહકોને વધારાની સિક્યોરિટી ડિપોઝિટ ભરવા અંગે નોટિસ આપવામાં આવતાં ગ્રાહકોમાં કચવાટ જોવા મળી રહ્યો છે.

ડીજીવીસીએલ દ્વારા આપવામાં આવેલી નોટિસમાં ગ્રાહકોને વીજ વપરાશના આધારે નક્કી થતી સિક્યોરિટી ડિપોઝિટની રકમ 30 દિવસમાં ભરવા સૂચના આપવામાં આવી છે. નિર્ધારિત સમયગાળામાં રકમ ભરવામાં નહીં આવે તો નિયમ મુજબ કાર્યવાહી કરવાની ચેતવણી પણ આપવામાં આવી હોવાનું જાણવા મળે છે.

જીઈઆરસીના સિક્યોરિટી ડિપોઝિટ સંબંધિત નિયમો મુજબ વીજ વિતરણ કંપની દ્વારા ગ્રાહકની સિક્યોરિટી ડિપોઝિટની રકમ પૂરતી છે કે નહીં તેની સમયાંતરે સમીક્ષા કરવામાં આવે છે. ગ્રાહકના અગાઉના વીજ વપરાશના આધારે જરૂરી સિક્યોરિટી ડિપોઝિટ હાલની જમા રકમ કરતાં વધુ જણાય તો નિયમ મુજબ વધારાની રકમની માંગ કરવામાં આવી શકે છે. આ ગણતરીમાં ગ્રાહકે અગાઉ ભરેલી સિક્યોરિટી ડિપોઝિટને ધ્યાનમાં લેવામાં આવે છે અને જરૂરી વધારાની રકમ જ વસૂલવાની રહે છે. બીજી તરફ, જરૂરી રકમ કરતાં ડિપોઝિટ વધુ હોય તો નિયમ મુજબ વધારાની રકમ પરત અથવા સમાયોજિત કરવાની જોગવાઈ પણ છે.

આ બાબતે વીજ ગ્રાહકોએ નોટિસમાં માંગવામાં આવેલી વધારાની રકમ કયા આધારે નક્કી કરવામાં આવી છે તેની સ્પષ્ટ માહિતી આપવાની માંગ કરી છે. સાથે જ છેલ્લા 12 મહિનાના વીજ વપરાશ અને હાલની સિક્યોરિટી ડિપોઝિટના આધારે કરવામાં આવેલી ગણતરીની વિગતો જાહેર કરવાની માંગ ઉઠાવી છે.

બીજી તરફ, ડીજીવીસીએલ તરફથી નિયમ મુજબની ગણતરીના આધારે જ વધારાની સિક્યોરિટી ડિપોઝિટની માંગ કરવામાં આવી હોવાનો દાવો કરવામાં આવ્યો છે. હાલ નોટિસ મળેલા ગ્રાહકો દ્વારા આ અંગે રજૂઆત અને ગણતરીની વિગતો મેળવવાની કાર્યવાહી કરવામાં આવી રહી છે.

બિલ 2 હજાર રૂપિયા આસપાસ આવતું હોય તેવા ગ્રાહકોને નોટિસ આપી છે : નાયબ ઈજનેર

રાનકૂવા સબ ડિવિઝનના નાયબ ઈજનેરના જણાવ્યા મુજબ, જે ગ્રાહકોની હાલની સિક્યોરિટી ડિપોઝિટ તેમના વીજ વપરાશની સરખામણીએ ઓછી છે અને જેમનાં માસિક બિલ અંદાજે 2 હજાર રૂપિયાની આસપાસ આવે છે, તેવા ગ્રાહકોને ડિપોઝિટ વધારવા માટે નોટિસ આપવામાં આવી છે.

જોડાણ વખતે ડિપોઝિટ ભર્યા બાદ ફરી શા માટે? : પૂર્વ તાલુકા પંચાયત સભ્ય

ફડવેલ ગામના પૂર્વ તાલુકા પંચાયત સભ્ય મહેશભાઈએ જણાવ્યું હતું કે જોડાણ લેતી વખતે ગ્રાહકો પાસેથી સિક્યોરિટી ડિપોઝિટ લેવામાં આવે છે. હવે ફરીથી ડિપોઝિટ ભરવા માટે મોટી સંખ્યામાં ગ્રાહકોને નોટિસ આપવામાં આવી છે. આ અંગે ઉચ્ચ કક્ષાએ લેખિત રજૂઆત કરવામાં આવશે.