ડાંગ આરોગ્ય વિભાગમાં ‘કમ્પલસરી બ્લડ ડોનેશન’ના મેસેજથી વિવાદ

કર્મચારીઓને ફરજિયાત રક્તદાનની સૂચના સામે ADHOની ‘ફરજિયાત નથી’ સ્પષ્ટતા, વિરોધાભાસથી ઊઠ્યા સવાલો

ડાંગ : વડાપ્રધાન નરેન્દ્ર મોદીના જન્મદિવસ નિમિત્તે આગામી 17 સપ્ટેમ્બર, 2026ના રોજ ડાંગ જિલ્લામાં બ્લડ ડોનેશન કેમ્પ યોજાનાર હોવાનું સામે આવ્યું છે. જોકે આરોગ્ય વિભાગના કર્મચારીઓ માટે રક્તદાન ફરજિયાત હોવાનો મેસેજ સોશિયલ મીડિયા તેમજ આરોગ્ય શાખાના વ્હોટ્સએપ ગ્રુપમાં વાયરલ થતાં મામલો ચર્ચામાં આવ્યો છે.

વાયરલ મેસેજમાં તમામ રેગ્યુલર તેમજ NHM સ્ટાફને 17/09/2026ના રોજ યોજાનારા બ્લડ ડોનેશન કેમ્પમાં “કમ્પલસરી બ્લડ ડોનેશન” કરવાનું રહેશે તેવી સૂચના આપવામાં આવી હોવાનું જણાવાય છે. મેસેજમાં આ સૂચના Red ADHO તરફથી આપવામાં આવી હોવાનો ઉલ્લેખ કરવામાં આવ્યો હોવાનું પણ કહેવામાં આવી રહ્યું છે.

આ મામલે અધિક જિલ્લા આરોગ્ય અધિકારી (ADHO) ડૉ. હિમાંશુ ગામિતે વાયરલ મેસેજ અંગે વાત સાચી હોવાનું સ્વીકાર્યું હોવાનું જાણવા મળે છે. જોકે રક્તદાન વાસ્તવમાં ફરજિયાત નથી અને કર્મચારીઓને માત્ર વિનંતી કરવામાં આવશે તેવી સ્પષ્ટતા પણ તેમણે કરી હોવાનું કહેવાય છે.

એક તરફ “કમ્પલસરી બ્લડ ડોનેશન”નો મેસેજ અને બીજી તરફ “રક્તદાન ફરજિયાત નથી” તેવી સ્પષ્ટતા સામે આવતા કર્મચારીઓમાં મૂંઝવણ સર્જાઈ છે. હવે સવાલ એ ઊભો થયો છે કે, જો રક્તદાન સંપૂર્ણપણે સ્વૈચ્છિક છે તો ફરજિયાત શબ્દોનો ઉપયોગ શા માટે કરવામાં આવ્યો?

રક્તદાન માનવજીવન બચાવતું અને સામાજિક રીતે પ્રશંસનીય કાર્ય છે, પરંતુ નોકરીના માહોલમાં ઉચ્ચ અધિકારી તરફથી આવતી સૂચનાને કર્મચારીઓ ફરજિયાત આદેશ તરીકે લઈ શકે છે. તેથી રક્તદાન સંપૂર્ણપણે સ્વૈચ્છિક છે કે નહીં તે અંગે શરૂઆતથી જ સ્પષ્ટતા હોવી જરૂરી માનવામાં આવી રહી છે.

સમગ્ર મામલે જિલ્લા આરોગ્ય તંત્ર દ્વારા એ સ્પષ્ટ કરવામાં આવે તેવી માંગ ઉઠી રહી છે કે મેસેજ કોણે અને કયા અધિકારથી મોકલ્યો, “કમ્પલસરી બ્લડ ડોનેશન”નો ચોક્કસ અર્થ શું છે અને કોઈ કર્મચારી રક્તદાન ન કરે તો તેની સામે કોઈ કાર્યવાહી થશે કે નહીં. કેમ્પમાં રક્તદાન સંપૂર્ણપણે સ્વૈચ્છિક રહેશે તેની સત્તાવાર ખાતરી આપવામાં આવે તેવી પણ માંગ થઈ રહી છે.