વઘઈમાં ગેરકાયદેસર દારૂના વેચાણ સામે પોલીસની કાર્યવાહી, 18 બોટલ સાથે એક ઝડપાયો

વાયરલ થયેલા દારૂના વેચાણના વીડિયો બાદ તપાસ હાથ ધરાઈ, ₹1,280નો પ્રોહિબિશન મુદ્દામાલ કબજે

ડાંગ : ડાંગ જિલ્લામાં ગેરકાયદેસર પ્રોહિબિશનની પ્રવૃત્તિઓ સામે પોલીસ દ્વારા કાર્યવાહી હાથ ધરવામાં આવી રહી છે. તે અંતર્ગત વઘઈ ટાઉન વિસ્તારમાં દારૂના ગેરકાયદેસર વેચાણ અંગેનો વીડિયો વાયરલ થતાં વઘઈ પોલીસે તપાસ હાથ ધરી હતી.

પોલીસે વઘઈ ટાઉન વિસ્તારમાં પેટ્રોલિંગ દરમિયાન સિંગલ ફળિયું, રેલવે સ્ટેશન પાસેની ગલીમાંથી એક શંકાસ્પદ ઇસમને ઝડપી પાડ્યો હતો. તપાસ દરમિયાન તેની પાસેથી ભારતીય બનાવટની વિદેશી તથા દેશી દારૂની કુલ 18 શીલબંધ બોટલો મળી આવી હતી, જેની કિંમત આશરે ₹1,280 હોવાનું પોલીસે જણાવ્યું હતું.

દારૂના જથ્થા અંગે પાસ-પરમીટ રજૂ ન કરી શકતાં પોલીસે સાગરભાઈ અરૂણભાઈ કુંવર, ઉંમર 23 વર્ષ, રહે. વઘઈ હનુમાન ફળિયું, તા. વઘઈ, જી. ડાંગને ઝડપી પાડી તેની સામે વઘઈ પોલીસ સ્ટેશનમાં પ્રોહિબિશન એક્ટ હેઠળ ગુનો નોંધી વધુ કાયદેસરની કાર્યવાહી હાથ ધરી છે.