ડાંગના બે યુવાનોએ 6,111 મીટર ઊંચું માઉન્ટ યુનામ શિખર સર કરી રચ્યો ઇતિહાસ

હિમાલયની કઠિન પરિસ્થિતિઓ અને ઓક્સિજનની અછત વચ્ચે શિખર સર કરી તિરંગો લહેરાવ્યો

ડાંગ : હિમાલયની કઠિન પરિસ્થિતિઓ વચ્ચે ડાંગ જિલ્લાના બે સાહસિક યુવાનોએ 6,111 મીટર (20,049 ફીટ) ઊંચું માઉન્ટ યુનામ શિખર સફળતાપૂર્વક સર કરી જિલ્લાનું નામ ગૌરવવંતુ બનાવ્યું છે. આહવા તાલુકાના કોસંબિયા ગામના ગવળી અનિલભાઈ રાજુભાઈ અને ગવળી શિવરામભાઈ શુકરભાઈએ હિમાલય પરિભ્રમણ કાર્યક્રમ દરમિયાન આ નોંધપાત્ર સિદ્ધિ મેળવી હતી.

ગુજરાત સરકારના કમિશનર, યુવક સેવા અને સાંસ્કૃતિક પ્રવૃત્તિઓ વિભાગ, ગાંધીનગર તથા સ્વામી વિવેકાનંદ પર્વતારોહણ સંસ્થાન (SVIM), માઉન્ટ આબુના સંયુક્ત ઉપક્રમે આયોજિત 15 દિવસીય કાર્યક્રમમાં બંને યુવાનોએ ભાગ લીધો હતો. અભિયાન દરમિયાન તેઓએ 4,600 મીટરની ઊંચાઈ પર આવેલા ભરતપુર અને ત્યારબાદ 5,364 મીટરના બેઝ કેમ્પથી કઠિન ચડાણ શરૂ કર્યું હતું.

અત્યંત ઠંડી, વિષમ આબોહવા અને ઊંચાઈ પર ઓક્સિજનની અછત જેવા પડકારોનો સામનો કરી બંને યુવાનોએ માઉન્ટ યુનામની ટોચ પર પહોંચીને તિરંગો લહેરાવ્યો હતો.

વાંસદાની SOS–યશ એડવેન્ચરના લેફ્ટીનેન્ટ ડૉ. વિજય ડી. પટેલે બંને યુવાનોની સિદ્ધિને બિરદાવતાં જણાવ્યું હતું કે, આ સફળતા ડાંગ તથા ગુજરાતના અન્ય યુવાનોને રમતગમત, સાહસ અને પર્વતારોહણ ક્ષેત્રે આગળ વધવા માટે પ્રેરણા આપશે.

બંને પર્વતારોહકો સુરક્ષિત રીતે વતન પરત ફરતાં ડાંગ જિલ્લામાં આનંદ અને ગૌરવની લાગણી પ્રસરી છે. તેમની આ સિદ્ધિ બદલ અભિનંદન તથા ઉજ્જવળ ભવિષ્ય માટે શુભેચ્છાઓ પાઠવવામાં આવી રહી છે.