સાપુતારામાં વરસાદ અને ગાઢ ધુમ્મસને કારણે બોટિંગ બંધ

પ્રવાસીઓની સલામતીને ધ્યાનમાં રાખી સર્પગંગા તળાવમાં તંત્રનો નિર્ણય

સાપુતારા : ગિરિમથક સાપુતારામાં છેલ્લા કેટલાક દિવસોથી ભારે વરસાદ અને ગાઢ ધુમ્મસનું વાતાવરણ જોવા મળી રહ્યું છે. ધુમ્મસને કારણે સર્પગંગા તળાવ વિસ્તારમાં દૃશ્યતા ઓછી થઈ જતાં બોટિંગ જોખમી બની શકે તેવી સ્થિતિ સર્જાઈ છે. જેને પગલે પ્રવાસીઓની સુરક્ષાને ધ્યાનમાં રાખીને તંત્ર દ્વારા તળાવમાં બોટિંગ બંધ રાખવાનો નિર્ણય લેવામાં આવ્યો છે.

અગાઉ ખરાબ હવામાન વચ્ચે પણ બોટિંગ ચાલુ હોવાના આક્ષેપો સ્થાનિકો અને પ્રવાસીઓ દ્વારા કરવામાં આવ્યા હતા. સાથે જ કેટલીક બોટો જૂની અને જર્જરિત હોવા તથા વરસાદ દરમિયાન તેમાં પાણી ભરાવાની સ્થિતિ અંગે પણ સવાલો ઉઠ્યા હતા. પ્રવાસીઓની સુરક્ષાનો મુદ્દો સામે આવ્યા બાદ તંત્ર દ્વારા આ બાબતે ગંભીરતાથી ધ્યાન આપવામાં આવ્યું છે.

ગત રવિવારે ભારે વરસાદ અને ગાઢ ધુમ્મસ વચ્ચે સર્પગંગા તળાવમાં બોટિંગ સંપૂર્ણપણે બંધ રાખવામાં આવ્યું હતું. વરસાદી સિઝનમાં સાપુતારામાં મોટી સંખ્યામાં પ્રવાસીઓ આવતા હોવાથી ખરાબ હવામાન અને ઓછી દૃશ્યતાની સ્થિતિમાં બોટિંગ બંધ રાખવાનો નિર્ણય પ્રવાસીઓની સલામતી માટે મહત્વપૂર્ણ માનવામાં આવી રહ્યો છે.