ડાંગ જિલ્લામાં પોષણ માસનો શુભારંભ

જિલ્લા વિકાસ અધિકારી કુલદીપસિંહ ઝાલાની અધ્યક્ષતામાં આયોજન બેઠક; 8 ઓક્ટોબર સુધી પાંચ મુખ્ય પેટા થીમ હેઠળ વિવિધ કાર્યક્રમો યોજાશે

ડાંગ : સમગ્ર દેશની સાથે ડાંગ જિલ્લામાં પણ રાષ્ટ્રીય પોષણ માસનો શુભારંભ કરવામાં આવ્યો છે. પોષણ માસના સુચારૂ આયોજન અંગે ડાંગ જિલ્લા પંચાયત ભવન ખાતે જિલ્લા વિકાસ અધિકારી કુલદીપસિંહ ઝાલાની અધ્યક્ષતામાં બેઠક યોજાઈ હતી.

આગામી 8 ઓક્ટોબર સુધી ચાલનારા રાષ્ટ્રીય પોષણ માસના કાર્યક્રમો અસરકારક રીતે યોજાય તે માટે જિલ્લા વિકાસ અધિકારીએ સંબંધિત અધિકારીઓને માર્ગદર્શન આપ્યું હતું. તેમણે દરેક વિભાગને સોંપવામાં આવેલી કામગીરી ગંભીરતાપૂર્વક અને સમયમર્યાદામાં પૂર્ણ કરવા સૂચના આપી હતી.

બેઠક દરમિયાન વિવિધ વિભાગોએ કરવાની કામગીરી અંગે પાવર પોઇન્ટ પ્રેઝન્ટેશન દ્વારા વિગતવાર માહિતી આપવામાં આવી હતી. સાથે જ રિપોર્ટિંગ અને ડેટા એન્ટ્રીની કામગીરી સમયસર પૂર્ણ કરવા અંગે પણ અધિકારીઓને માર્ગદર્શન આપવામાં આવ્યું હતું.

‘અમારી આંગણવાડી : અમારી જવાબદારી’ મુખ્ય થીમ હેઠળ પોષણ માસ દરમિયાન પાંચ અલગ અલગ પેટા થીમ પર કાર્યક્રમો યોજાશે. જેમાં આહારની વિવિધતા અને પર્યાપ્ત પ્રોટીન, આંગણવાડી કેન્દ્રો પર તાજું રાંધેલું ભોજન, સામુદાયિક માલિકીપણું અને જવાબદારી, બાળપણના વિકાસ માટે પોષણ અને પ્રારંભિક ઉત્તેજન તથા પ્રધાનમંત્રી માતૃવંદના યોજના હેઠળ માતાના સ્વાસ્થ્ય માટે રોકડ ટ્રાન્સફર જેવા વિષયોનો સમાવેશ કરવામાં આવ્યો છે.

આ બેઠકમાં જિલ્લા પંચાયતની વિવિધ શાખાના વડાઓ તેમજ સંબંધિત અધિકારીઓ ઉપસ્થિત રહ્યા હતા.