દર મહિનાની 10 તારીખ સુધીમાં પગાર ચૂકવવાની મેયરની સૂચનાની અવગણના : આઉટસોર્સિંગ કર્મચારીઓમાં રોષ

નવસારી મનપાના 80થી વધુ આઉટસોર્સિંગ કર્મચારીઓને ઓગસ્ટનો પગાર ન મળતા બીજા દિવસે પણ રજા પર, સફાઈ સહિતની કામગીરીને અસર

નવસારી : નવસારી મહાનગરપાલિકાના 80થી વધુ આઉટસોર્સિંગ કર્મચારીઓને સમયસર પગાર ન મળતા તેઓ બીજા દિવસે પણ રજા પર રહ્યા હતા. દર મહિનાની 10 તારીખ સુધીમાં આઉટસોર્સિંગ કર્મચારીઓને નિયમિત પગાર ચૂકવવા માટે નવસારી મહાનગરપાલિકાના મેયર દ્વારા અગાઉ સૂચના આપવામાં આવી હતી, પરંતુ એજન્સીઓ દ્વારા આ સૂચનાનો અમલ ન થયો હોવાની ફરિયાદ ઉઠી છે.

નવસારી મહાનગરપાલિકા વિસ્તારમાં વિવિધ કામગીરી માટે આઉટસોર્સિંગના આધારે કર્મચારીઓ રાખવામાં આવ્યા છે. આ કર્મચારીઓ શહેરની સફાઈ, જાળવણી અને વિવિધ વિભાગોની કામગીરીમાં મહત્વપૂર્ણ ભૂમિકા ભજવે છે. તેમ છતાં તેમને સમયસર મહેનતાણું ન મળતું હોવાની ફરિયાદ અગાઉ પણ સામે આવી હતી.

ગત મહિને મનપાના માઈનોર વિભાગ, વોટર વર્ક્સ વિભાગ, ગાર્ડન અને એન્જિનિયરિંગ વિભાગ, ડ્રેનેજ-બાંધકામ વિભાગ તથા દબાણ હટાવ વિભાગના આઉટસોર્સિંગ કર્મચારીઓએ છેલ્લા ત્રણેક મહિનાથી પગાર ન મળતો હોવા અંગે મનપાના મેયર અને કારોબારી અધ્યક્ષ સમક્ષ રજૂઆત કરી હતી. ત્યારબાદ સંબંધિત એજન્સીઓને પગાર ચૂકવવા સૂચના અપાતા કર્મચારીઓને બાકી પગાર ચૂકવવામાં આવ્યો હતો.

આ સાથે મેયર અશોકભાઈ ધોરાજીયાએ આઉટસોર્સિંગ કર્મચારીઓને દર મહિનાની 10 તારીખ સુધીમાં નિયમિત પગાર ચૂકવવા સૂચના આપી હતી. જોકે, ઓગસ્ટ મહિનાનો પગાર ચાલુ માસની 10 તારીખ સુધીમાં ચૂકવવાની સૂચના હોવા છતાં 18 તારીખ સુધી કર્મચારીઓને પગાર ન મળ્યો હોવાની ફરિયાદ છે.

સમયસર પગાર ન મળતા આઉટસોર્સિંગ કર્મચારીઓ ફરી રજા પર ઉતરી ગયા હતા અને બીજા દિવસે પણ કામથી દૂર રહ્યા હતા. તેના કારણે શહેરમાં રોજિંદી કામગીરી અને સફાઈના કામને અસર પહોંચી હોવાનું જણાવાયું છે.

આઉટસોર્સિંગ કર્મચારીઓ શહેરની સફાઈ જાળવવા ઉપરાંત પૂર જેવી આપત્તિજનક પરિસ્થિતિમાં પણ કામગીરી બજાવે છે. આવા કર્મચારીઓને સમયસર પગાર મળે તે માટે મહાનગરપાલિકાના ઉચ્ચ અધિકારીઓ અને શાસકો દ્વારા સંબંધિત એજન્સીઓ સામે કડક દેખરેખ રાખવાની માંગ ઉઠી છે. સમયસર પગાર ન ચૂકવનારી એજન્સીઓ સામે જરૂરી નિયમસર કાર્યવાહી કરવામાં આવે તેવી માંગ પણ કરવામાં આવી છે.