નવસારીમાં સિટી બસ સેવા સામે રિક્ષાચાલકોમાં રોષ : રોજીરોટી છીનવાઈ જવાની ભીતિ વચ્ચે પાલિકાને રજૂઆત

બસ સેવાનો વિરોધ નહીં, પરંતુ નિયત સ્ટોપ, રૂટ, મુસાફરોની મર્યાદા અને ટ્રાફિક નિયમોનું કડક પાલન કરાવવાની ઓટો રિક્ષા એસોસિએશનની માંગ

નવસારી : શહેરમાં શરૂ કરાયેલી પ્રાઇવેટ સિટી બસ સેવાને કારણે સામાન્ય રિક્ષાચાલકોની રોજીરોટી પર ગંભીર અસર પડી રહી હોવાની રજૂઆત નવસારી ઓટો રિક્ષા એસોસિએશન દ્વારા કરવામાં આવી છે. એસોસિએશનના પ્રમુખ ગણેશભાઈ કાનકાટે દ્વારા નવસારી મહાનગરપાલિકાના મેયરને લેખિત આવેદનપત્ર પાઠવી સિટી બસ સેવાના સંચાલનમાં યોગ્ય નિયમન કરવાની માંગ કરવામાં આવી છે.

રિક્ષાચાલકોએ રજૂઆતમાં જણાવ્યું છે કે નવસારીમાં મોટા ઉદ્યોગ-ધંધા ન હોવાથી સ્થાનિક રિક્ષાચાલકો મુખ્યત્વે ઘરકામ કરતા શ્રમિકો અને ટ્રેન મુસાફરો પર નિર્ભર રહી પરિવારનું ગુજરાન ચલાવે છે. સિટી બસ સેવા શરૂ થયા બાદ રિક્ષાચાલકોને આર્થિક મુશ્કેલીનો સામનો કરવો પડી રહ્યો હોવાનો દાવો કરવામાં આવ્યો છે. પરિસ્થિતિ યથાવત રહે તો પરિવારોની આર્થિક સ્થિતિ ગંભીર બનશે તેવી ચિંતા પણ તેમણે વ્યક્ત કરી છે.

રિક્ષા એસોસિએશને સ્પષ્ટ કર્યું છે કે તેઓ જનતા માટે શરૂ કરાયેલી બસ સેવાનો વિરોધ કરતા નથી, પરંતુ બસ સંચાલનમાં થતી હોવાનું કહેવાતી ગેરરીતિઓ સામે નિયમોનું કડક પાલન કરાવવું જરૂરી છે.

એસોસિએશને માંગ કરી છે કે બસો માત્ર નિયત સ્ટોપ પર જ ઊભી રાખવામાં આવે અને પાકા બસ સ્ટોપ તૈયાર ન થાય ત્યાં સુધી નિર્ધારિત પોઇન્ટ પરથી જ મુસાફરોને બેસાડવામાં આવે. રસ્તા વચ્ચે ગમે ત્યાંથી મુસાફરો ભરવાની પ્રવૃત્તિ પર રોક લગાવવામાં આવે.

કેટલાક રૂટ પર બસ પર રૂટની માહિતી દર્શાવવામાં આવતી ન હોવાની તથા કોલેજો છૂટવાના સમયે બસો મનફાવે તેમ દોડાવવામાં આવતી હોવાની રજૂઆત કરી તેના પર અંકુશ મૂકવાની માંગ કરવામાં આવી છે.

રિક્ષા સ્ટેન્ડ નજીક બસો ઊભી રાખી મુસાફરોને આકર્ષવા માટે બૂમો પાડવાની અને રિક્ષામાંથી મુસાફરો ઉતારી લેવાની પ્રવૃત્તિ બંધ કરાવવાની માંગ પણ કરવામાં આવી છે.

આ ઉપરાંત બસોના આડેધડ પાર્કિંગ, રિક્ષાઓને ઓવરટેક કરીને અચાનક બ્રેક મારવી તથા પરમિટ કરતાં વધુ મુસાફરો ભરવા જેવી પ્રવૃત્તિઓ સામે કડક કાર્યવાહી કરવાની માંગ કરવામાં આવી છે. બસનું લઘુત્તમ ભાડું રૂ. 10 રાખવા, હાલ કાર્યરત બસોની સંખ્યા અને રૂટ જાહેર કરવા તેમજ વધુ બસો ન વધારવા અંગે ખાતરી આપવાની માંગ પણ એસોસિએશને રજૂ કરી છે.