સેવા સંકલ્પ અભિયાનમાં એક જ દિવસમાં રાજ્યવ્યાપી 410 રક્તદાન કેમ્પથી 18,500થી વધુ બોટલ રક્ત એકત્ર

વડાપ્રધાન નરેન્દ્રભાઈ મોદીની 25 વર્ષની અવિરત જન સેવા-સાધનાની સેવા સંકલ્પ અભિયાનથી રાજ્યવ્યાપી ઉજવણી

નવસારી : વડાપ્રધાન નરેન્દ્રભાઈ મોદીની અવિરત જન સેવા-સાધનાના 25 વર્ષની સફળતાની ઉજવણી દેશભરમાં સેવા સંકલ્પ અભિયાન દ્વારા કરવામાં આવી રહી છે. વડાપ્રધાનના 76મા જન્મદિવસ નિમિત્તે 17 સપ્ટેમ્બરથી એક મહિના સુધી આ અભિયાન અંતર્ગત વિવિધ સેવાકીય કાર્યક્રમો જનભાગીદારી સાથે યોજાશે.

વડાપ્રધાનના જન્મદિવસની ઉજવણી અંતર્ગત મુખ્યમંત્રી ભૂપેન્દ્ર પટેલના દિશાદર્શનમાં સમગ્ર રાજ્યમાં રક્તદાન કેમ્પનું વિશેષ આયોજન કરવામાં આવ્યું હતું. **“સેવા મેરા યોગદાન”**ના મંત્ર સાથે “રક્તદાન મહાદાન” અને જરૂરતમંદને જીવનદાન આપવાના ધ્યેયથી રાજ્યના 34 જિલ્લાઓમાં લોકભાગીદારીથી અંદાજે 410 સ્વૈચ્છિક રક્તદાન કેમ્પ યોજાયા હતા.

આ કેમ્પોમાં એન.સી.સી. કેડેટ્સ, વિદ્યાર્થીઓ, યુવાનો, સુરક્ષાકર્મીઓ અને સમાજસેવી નાગરિકોએ ઉત્સાહપૂર્વક ભાગ લીધો હતો. રાજ્યભરના આ રક્તદાન કેમ્પોમાં કુલ 18,578 બોટલ રક્ત એકત્ર કરવામાં આવ્યું હતું.

વડાપ્રધાન નરેન્દ્રભાઈ મોદીના સુશાસન કાળ અને સેવાકાર્યોને જનજન સુધી પહોંચાડવાના વિવિધ કાર્યક્રમોની શ્રેણીમાં તેમના 76મા જન્મદિવસે યોજાયેલી આ રાજ્યવ્યાપી રક્તદાન શિબિર મહત્વપૂર્ણ બની હતી.