નવસારી જિલ્લામાં વાજબી ભાવની દુકાનોની આકસ્મિક તપાસણી

બે વાજબી ભાવની દુકાનોમાં અનાજનો જથ્થો ઓછો જણાતા સંચાલકોને નોટિસ ફટકારાઈ

નવસારી : નવસારી જિલ્લા કલેક્ટરના માર્ગદર્શન હેઠળ જાહેર વિતરણ વ્યવસ્થા અંતર્ગત અગ્રતા ધરાવતા કુટુંબોને કરવામાં આવતા અનાજ વિતરણની ચકાસણી માટે કુલ 7 ટીમોની રચના કરવામાં આવી હતી. ટીમો દ્વારા જિલ્લામાં વાજબી ભાવની દુકાનો પર આકસ્મિક તપાસ હાથ ધરવામાં આવી હતી.

તપાસ દરમિયાન નવસારી તાલુકાની ગણેશ સિસોદ્રા વાજબી ભાવની દુકાનમાં 1837.500 કિગ્રા ઘઉં, 477 કિગ્રા ચોખા તથા 1267 કિગ્રા બાજરીનો જથ્થો ઓછો હોવાનું જણાયું હતું. અન્ય તાલુકાઓની દુકાનોમાં પણ જરૂરી તકેદારી અને નિયમોની અમલવારીમાં ખામીઓ જોવા મળી હતી.

આ ઉપરાંત ગત 27 ઓગસ્ટના રોજ વાંસદા મામલતદારને મળેલી ફરિયાદના આધારે વાંસદા તાલુકાના હનુમાનબારી ખાતે આવેલી વાજબી ભાવની દુકાનની તપાસ કરવામાં આવી હતી. તપાસ દરમિયાન 3104 કિગ્રા ઘઉં, 4298 કિગ્રા ચોખા, 706 કિગ્રા ખાંડ, 192 કિગ્રા તુવેર દાળ તથા 647 કિગ્રા ચણાનો જથ્થો ઓછો હોવાનું સામે આવ્યું હતું.

આ બાબતને ગંભીરતાથી લઈ સંબંધિત વાજબી ભાવની દુકાનના સંચાલકોને નોટિસ ફટકારવામાં આવી હતી. આગામી સમયમાં તેમની સામે નિયમોનુસાર દંડાત્મક કાર્યવાહી કરવામાં આવશે.