એરૂ ગામે મૃતકના નામે બોગસ પાવર ઓફ એટર્ની બનાવી બિલ્ડરે તેના સાથીઓ સાથે મળી કરોડોની જમીનનો ખેલ પાડ્યો

જમીન માલિકના મૃત્યુના 6 વર્ષ બાદ બિલ્ડરોએ બોગસ પાવર ઓફ એટર્ની સરકારી કચેરીઓમાં રજૂ કરી જમીનના દસ્તાવેજો કરાવ્યા હતા; એક આરોપી ઝડપાયો, બિલ્ડર સહિત 5 વોન્ટેડ

નવસારી : નવસારીના નામચીન બિલ્ડરે તેના સાથીઓ સાથે મળી જલાલપોર તાલુકાના એરૂ ગામની જમીનના મૃત્યુ પામેલા જમીન માલિકના 6 વર્ષ બાદ પાવર ઓફ એટર્ની બનાવી સરકારી કચેરીમાં રજૂ કરી જમીન દસ્તાવેજો કરી લીધા હોવા બાબતે જલાલપોર પોલીસ મથકે ફરિયાદ નોંધાઈ છે. આ કરોડો રૂપિયાની જમીન પચાવી પાડવાના કૌભાંડથી ચકચાર મચી જવા પામી છે. આ મામલે જલાલપોર પોલીસે બિલ્ડરના સાથીને ઝડપી પાડ્યો છે. જયારે બિલ્ડર સહીત 5 આરોપીઓ પોલીસ પકડથી દૂર હોવાનું જાણવા મળ્યું છે.

મળતી માહિતી મુજબ, જલાલપોર તાલુકાના એરૂ ગામે આવેલી બ્લોક સર્વે નં. 892/2, 455/1, 892/2, 63/6/1 તથા 682 વાળી જમીનના મૂળ માલિક ચીમનલાલ કરશનજી દેસાઈ હતા. જેમનું ગત 11મી ઓગસ્ટ 1999ના રોજ વડોદરા ખાતે અવસાન થયું હતું. જેથી નવસારીના નામચીન બિલ્ડર અને સુરત મોટા વરાછા તાપ્તી ગ્રીનની બાજુમાં મંત્ર લક્ઝુરિયસમાં રહેતા મહેશ જયંતીભાઈ સાંગાણી, જલાલપોર તાલુકાના એરૂ જી.બી. પાર્કમાં રહેતા રમેશભાઈ રવજીભાઈ ભીમાણી, સુરત ઉમરવાડા બોમ્બે માર્કેટ વિક્રમ નગરમાં રહેતા ઉકાભાઇ રામભાઈ વાળા, સુરત સહજાનંદ રેસિડન્સીમાં રહેતા મુકેશભાઈ મનસુખભાઇ મેંદપરા, નાનજીભાઈ વલ્લભભાઈ વઘાસીયા અને મી. એસ.પી. શિંદેએ સ્વ. ચીમનલાલ દેસાઈની જમીન પચાવી પાડવા માટે કાવતરૂ રચ્યું હતું. જેથી તેઓએ ચીમનલાલ દેસાઈનું અવસાન થયાના આશરે છ વર્ષ બાદ 15 મે 2005ના રોજ સ્વ. ચીમનલાલ દેસાઈના નામે ખોટો અને બનાવટી જનરલ પાવર ઓફ એટર્ની યાને કુલમુખત્યારનામુ બનાવી લીધો હતો.

આ બોગસ પાવર ઓફ એટર્નીના આધારે તેઓએ જલાલપોર સબ-રજિસ્ટ્રાર કચેરીમાં જમીનના વેચાણ દસ્તાવેજો રજિસ્ટર કરાવવામાં આવ્યા હતા. ત્યારબાદ મૂળ જમીનમાલિકના વારસદારોની જાણ બહાર જમીન અન્ય વ્યક્તિઓના નામે ચઢાવી દેવામાં આવી હતી. આ સમગ્ર પ્રક્રિયા પાછળ જમીનના ટાઈટલને નુકસાન પહોંચાડી આર્થિક લાભ મેળવવાનો હેતુ હોવાના આક્ષેપ કરવામાં આવ્યા છે.

ત્યારે ખોટો પાવર ઓફ એટર્ની બનાવી તે પાવરના આધારે સબંધિત કચેરીઓમાં ખોટી માહિતી પુરી પાડી જમીન દસ્તાવેજો કરાવી ઠગાઈ કરી હોવાનો ગુનો જલાલપોર પોલીસ મથકે નોંધાયો છે. જેથી પોલીસે આરોપી મુકેશ મનસુખભાઈ મેંદપરાને ઝડપી પાડ્યો હતો. જયારે બિલ્ડર મહેશ સાંગાણી અને તેના સાથીઓ ઉકાભાઈ વાળા, નાનજીભાઈ વઘાસીયા, મી.એસ.પી. સિંદે અને રમેશભાઈ ભીમાણીને વોન્ટેડ જાહેર કરી આગળની કાર્યવાહી હાથ ધરી છે.