ઇટાળવા-એરૂ રોડ બન્યો અકસ્માત ઝોન, બેફામ વાહનચાલકોથી સ્થાનિકો પરેશાન

નશાની હાલતમાં હોવાનો આક્ષેપ ધરાવતા કારચાલકે મોપેડ સવાર મહિલાને ટક્કર મારી; સદનસીબે ગંભીર ઈજા ટળી, પોલીસે કાર્યવાહી હાથ ધરી

નવસારી : નવસારીના ઇટાળવા-એરૂ રોડ પર ગત રાત્રે કારચાલકે મોપેડ પર જઈ રહેલી મહિલાને ટક્કર મારતાં અકસ્માત સર્જાયો હતો. ટક્કરથી મહિલા રસ્તા પર પટકાઈ હતી. જોકે સદનસીબે તેને ગંભીર ઈજા થઈ ન હતી. આ ઘટનાને પગલે બેફામ વાહનચાલકો સામે મનપા તંત્ર અને પોલીસ વિભાગ સંયુક્ત કામગીરી કરે તેવી માંગ ઉઠી છે.

અકસ્મત બાદ ઘટનાસ્થળે લોકોનું ટોળું એકત્ર થયું હતું. સ્થાનિકોના જણાવ્યા મુજબ, કારચાલક અને તેની સાથેનો મિત્ર નશાની હાલતમાં જણાયા હતા. મહિલાએ તાત્કાલિક પોલીસને જાણ કરતાં પોલીસે સ્થળ પર પહોંચી કારચાલકને ઝડપી પાડી કાર્યવાહી હાથ ધરી હતી. આ ઘટનાનો વીડિયો સોશિયલ મીડિયામાં વાઇરલ થતાં પોલીસની કામગીરી સામે પણ સવાલો ઉઠ્યા હતા.

થોડા દિવસ અગાઉ એરૂ ચાર રસ્તા નજીક પણ એક કારની ટક્કરથી લારીચાલકનું મોત થયું હતું. આ બનાવમાં શિવાંગ પટેલ પર નશાની હાલતમાં કાર ચલાવી અકસ્માત સર્જ્યાનો આક્ષેપ છે. સ્થાનિકો અને વાહનચાલકોના જણાવ્યા મુજબ, ઇટાળવાથી એરૂ રોડ પર વારંવાર અકસ્માતો થઈ રહ્યા છે. ખાસ કરીને રાત્રિ દરમિયાન કેટલાક વાહનચાલકો નશાની હાલતમાં અને પૂરઝડપે વાહનો હંકારતા હોવાની ફરિયાદો છે.

આ ઉપરાંત વધુ અવાજ કરતા સાયલેન્સર લગાવેલી બાઇક લઈને કેટલાક ચાલકો મોડી રાત્રે પસાર થતા હોવાથી સ્થાનિકો પરેશાન થઈ રહ્યા છે. આવા વાહનચાલકો સામે તપાસ અને કાર્યવાહી કરવાની માંગ કરવામાં આવી છે.

ઇટાળવાથી એરૂ ચાર રસ્તા સુધીનો માર્ગ નવસારી ગ્રામ્ય, વિજલપોર અને જલાલપોર પોલીસ સ્ટેશનની હદમાં આવે છે. જિલ્લા પોલીસ અધિક્ષક દ્વારા વિશેષ ટીમ બનાવી આ માર્ગ પર ચેકિંગ કરાવવામાં આવે તો નશાની હાલતમાં વાહન ચલાવતા, પૂરઝડપે વાહનો હંકારતા અને વધુ અવાજવાળા સાયલેન્સર લગાવનારા ચાલકો સામે કાર્યવાહી થઈ શકે છે.

ઇટાળવા-એરૂ રોડ પર સ્ટ્રીટ લાઇટ લગાવવી જરૂરી

નવસારી મનપા દ્વારા ઇટાળવા-એરૂ રોડને પહોળો કરવામાં આવ્યો છે અને તેનું મહત્તમ કામ પૂર્ણ થઈ ગયું છે. જોકે રોડની આસપાસ સ્ટ્રીટ લાઇટો લગાવવામાં આવી નથી. તેના કારણે રાત્રિ દરમિયાન વાહનચાલકોને મુશ્કેલી પડે છે. સાથે જ રાહદારીઓ માટે રસ્તાની બાજુમાંથી પસાર થવું અને રસ્તો ઓળંગવો જોખમી બન્યું છે.