જલાલપોર તાલુકામાં નેશનલ હાઈવેની માર્જિનમાં આવતા દબાણોને હટાવવાની કામગીરી શરૂ

વેસ્મા-રણોદરા પટ્ટામાં દુકાનો, કેબિન અને કમ્પાઉન્ડ વોલ દૂર કરાઈ; અન્ય પાકા દબાણો આગામી 2થી 3 દિવસમાં હટાવાશે

નવસારી : સુપ્રીમ કોર્ટ દ્વારા સુઆ મોટો પિટિશનમાં ગત 13મી એપ્રિલ, 2025ના રોજ આપવામાં આવેલા આદેશના અનુસંધાને રાષ્ટ્રીય ધોરીમાર્ગોની રાઈટ ઓફ વે મુજબ નિયંત્રણ રેખાની મર્યાદામાં આવતા ગેરકાયદેસર બાંધકામો, ઢાબા, રેસ્ટોરન્ટ તેમજ અન્ય વાણિજ્યિક પ્રવૃત્તિ કરતા એકમોને દૂર કરવાની કાર્યવાહી કરવા જણાવાયું છે.

જે અન્વયે નવસારી કલેક્ટર કચેરી દ્વારા ગત 4થી જૂનના રોજ જિલ્લા કક્ષાએ હાઈવે સેફ્ટી ટાસ્ક ફોર્સની રચના કરવામાં આવી હતી. આ ટાસ્ક ફોર્સના અધ્યક્ષ તરીકે જિલ્લા કલેક્ટર છે. જિલ્લા કલેક્ટરના માર્ગદર્શન અને સૂચનાઓ અનુસાર નેશનલ હાઈવે ઓથોરિટી ઓફ ઈન્ડિયાના અધિકારીઓને સાથે રાખી રાષ્ટ્રીય ધોરીમાર્ગોની નિયંત્રણ રેખા અંગે સ્થળ પર ચકાસણી અને જરૂરી કાર્યવાહી હાથ ધરવામાં આવી રહી છે.

જેના ભાગરૂપે આજે જલાલપોર મામલતદાર મૃણાલદાન ઇસરાણી તેમની ટીમ સાથે જલાલપોર તાલુકાના વેસ્મા-રણોદરા પટ્ટા પર નેશનલ હાઈવેની માર્જિનમાં આવતા દબાણોને હટાવવા માટે પહોંચ્યા હતા. એનએચએઆઈના અધિકારીઓ દ્વારા ડિમોલેશન માટે માર્કિંગ કરી સંબંધિત લોકોને અગાઉથી જાણ કરવામાં આવી હતી.

જલાલપોર મામલતદાર અને નવસારી ગ્રામ્ય પી.આઈ. દ્વારા કાયદો અને વ્યવસ્થા જળવાઈ રહે તે માટે જરૂરી બંદોબસ્ત ગોઠવી અલગ-અલગ સ્થળોએ ડિમોલેશનની કામગીરી હાથ ધરવામાં આવી હતી.

કાર્યવાહી દરમિયાન પતરાના શેડવાળી ચાર કાચી દુકાનો તોડી દૂર કરવામાં આવી હતી. હાઈવેની માર્જિનમાં આવતી એક કેબિનને રિલોકેટ કરી દબાણ દૂર કરવામાં આવ્યું હતું. સાથે જ એક ઈથેનોલ મેન્યુફેક્ચરિંગ યુનિટની કમ્પાઉન્ડ વોલ પણ દૂર કરવામાં આવી હતી.

આ ઉપરાંત જલાલપોર તાલુકાના રણોદરાથી સંદલપોર તરફના હાઈવેની માર્જિનમાં આવતા પાકા બાંધકામોના દબાણને માર્ક કરવામાં આવ્યા છે. આ દબાણોને આગામી 2થી 3 દિવસમાં દૂર કરવાની કાર્યવાહી હાથ ધરવામાં આવશે.