જમાલપોરની ક્રિષ્ના લક્ઝુરીયસ સોસાયટીમાં ગેસ પાઈપલાઈન નાંખવા અને કનેક્શન આપવા માંગ

ડીસેમ્બર ૨૦૨૫માં અરજી છતાં કામગીરી પેન્ડીંગ રહેતા રહીશોની ગુજરાત ગેસના નવસારી એરિયા મેનેજરને લેખિત રજૂઆત

નવસારી : જમાલપોરની ક્રિષ્ના લક્ઝુરીયસ સોસાયટીમાં ગેસ પાઈપલાઈન નાંખવા અને કનેક્શન આપવાની માંગ કરી સોસાયટીના રહીશોએ ગુજરાત ગેસ લીમીટેડના નવસારી એરિયા મેનેજરને લેખિતમાં રજૂઆત કરી છે.

જમાલપોરની ક્રિષ્ના લક્ઝુરીયસ સોસાયટીના રહીશોએ ગુજરાત ગેસ લીમીટેડના નવસારી એરિયા મેનેજરને કરેલી લેખિતમાં રજૂઆતમાં જણાવ્યું હતું કે, સોસાયટી દ્વારા ડીસેમ્બર ૨૦૨૫ માં ઘરગથ્થુ કનેક્શન માટે નિયમ મુજબ અરજી કરવામાં આવી હતી. તેની જરૂરી તમામ પ્રારંભિક વિધિઓ પૂર્ણ કરવામાં આવી હતી. જે અરજી ક્રિષ્ના કન્સ્ટ્રકશનના નામે રજીસ્ટર્ડ છે.

પરંતુ લાંબો સમય વીતી ગયો હોવા છતાં હજુ સુધી ગેસ પાઈપલાઈન નાંખવાનું અને કનેક્શન આપવાનું કામ પેન્ડીંગ છે. જેના કારણે સોસાયટીના રહીશોને ખુબ જ ગંભીર મુશ્કેલીઓનો સામનો કરવો પડી રહ્યો છે.

હાલમાં જ ડીજીવીસીએલ દ્વારા નવા રસ્તા પર પોતાની લાઈન આપવાની મંજુરી આપીને કામ પૂર્ણ કર્યું છે. ત્યારે ગુજરાત ગેસ લીમીટેડ દ્વારા પાઈપલાઈન નાંખવામાં કયો ટેકનીકલ કે વહીવટી વાંધો આવી શકે છે તેવો સવાલ કર્યો હતો.

સોસાયટીમાં મોટાભાગના રહીશો અગાઉ ભાડાના મકાનમાં અથવા પોતાના અન્ય ઘરમાં રહેતા હોવાથી તેમની પાસે પોતાના નામે નવા એલપીજી સીલીન્ડર કનેક્શન ઉપલબ્ધ નથી. પીએનજી કનેક્શન મળી જશે તેવી આશાએ ઘણા રહીશોએ નવું એલપીજી કનેક્શન લીધું નથી. જેથી સોસાયટીમાં ગેસ પાઈપલાઈન નાંખવા અને કનેક્શન આપવાની માંગ કરી છે.