ખડસુપા ગામે તળાવ ઊંડું કરવાનો ઠરાવ રદ કરાયો, ઈજારદાર પહોંચ્યો હાઈકોર્ટના દ્વારે

ટીડીઓના રદ હુકમની જાણ ન કર્યાના આક્ષેપ; સરપંચ-તલાટીએ વિવિધ વિભાગોને અંધારામાં રાખી તળાવ ખોદાવ્યું હોવાનો દાવો

નવસારી : ખડસુપા ગામે સરપંચ અને તલાટીએ તળાવ ઊંડું કરવા માટે મંજૂર કરેલો ઠરાવ ટેન્ડર પ્રક્રિયામાં પારદર્શિતાના અભાવને કારણે તાલુકા વિકાસ અધિકારીએ રદ કર્યો હતો. જોકે આ બાબતની જાણ ઇજારદારને કરવામાં ન આવી હોવાના આક્ષેપ સાથે ઈજારદારે હાઈકોર્ટના દ્વાર ખખડાવ્યા છે.

નવસારી તાલુકાના ખડસુપા ગામે બ્લોક/સર્વે નં. 917 વાળા ગાડરિયા તળાવને ઊંડું કરવા બાબતે 2 ઓક્ટોબર 2023ની ગ્રામસભામાં ગ્રામજનોએ રજૂઆત કરી હતી. ત્યારબાદ ખડસુપા ગ્રામપંચાયતે 30 નવેમ્બર 2023ની સામાન્ય સભામાં તળાવ ઊંડું કરવા માટે બંધ કવરમાં વિકાસ ફાળાની વિગતો સહિત ભાવપત્રકો મંગાવવાનું નક્કી કર્યું હતું.

ભાવપત્રકો માટે ગ્રામપંચાયત કચેરીના નોટિસ બોર્ડ, મુખ્ય જાહેર માર્ગ અને ગામના ચોરા પર જાહેરાત કરવામાં આવી હતી. જેમાં ચાર ઈજારદારોએ તળાવ ઊંડું કરી માટી ખોદી લઈ જવા બદલ લોકફાળો/વિકાસ ફાળો આપવા અંગેના ભાવપત્રકો રજૂ કર્યા હતા.

30 ડિસેમ્બર 2023ના રોજ ભાવપત્રકો ખોલવામાં આવતા સુરેશભાઈ બળદેવભાઈ જોગરાણા તરફથી સૌથી ઊંચો ભાવ મળતાં તેમનું ટેન્ડર મંજૂર કરવામાં આવ્યું હતું. ત્યારબાદ સુરેશભાઈએ 6 જાન્યુઆરી 2024ના રોજ ખડસુપા ગ્રામપંચાયતમાં લોકફાળા પેટે રૂ. 5 લાખ જમા કરાવ્યા હતા.

આ દરમિયાન ગાડરિયા તળાવ ઊંડું કરવા બાબતે નવસારી તાલુકા વિકાસ અધિકારી સમક્ષ વાંધા અરજી કરવામાં આવી હતી. સુનાવણી દરમિયાન ટેન્ડર પ્રક્રિયા સહિતની કામગીરીમાં પારદર્શિતાનો અભાવ જણાતા ટીડીઓએ સુરેશભાઈના પક્ષમાં થયેલો ઠરાવ રદ કર્યો હતો.

ઈજારદાર સુરેશભાઈના આક્ષેપ મુજબ, ટીડીઓએ 22 એપ્રિલ 2024ના રોજ ઠરાવ રદ કરવાનો હુકમ કર્યો હોવા છતાં તેની જાણ તેમને કરવામાં આવી નહોતી. તેમનો દાવો છે કે સરપંચ અને તલાટીએ પણ રદ થયેલા ઠરાવ અંગે માહિતી આપ્યા વગર વિવિધ વિભાગોને અંધારામાં રાખી તળાવ ઊંડું કરવાની કામગીરી ચાલુ રાખવા જણાવ્યું હતું.

સુરેશભાઈએ વધુમાં આક્ષેપ કર્યો છે કે તળાવ ખોદવા માટે સરપંચ અને તલાટીએ અન્ય ઈજારદારને પણ મંજૂરી આપી હતી. સમગ્ર મામલે તેમણે હાઈકોર્ટમાં અરજી દાખલ કરી હતી, જેના પગલે હાઈકોર્ટે તળાવ ખોદકામ બાબતે સ્ટે આપ્યો હોવાનું જણાવાયું છે. હાલ આ કેસ હાઈકોર્ટમાં ચાલી રહ્યો છે.