શહેરમાં સફાઈના બણગા ફૂંકનાર નવસારી મનપાના શૌચાલયમાં જ ગંદકીનું સામ્રાજ્ય

વડાપ્રધાનના આગમન પૂર્વે શહેરભરમાં સ્વચ્છતા અભિયાન, મનપાની કચેરીના શૌચાલયની હાલત સામે ઉઠ્યા સવાલો

નવસારી : આગામી 8મીએ વડાપ્રધાન નવસારી નમો કમલમનું ઉદ્ઘાટન કરવા માટે આવી રહ્યા છે. જેને પગલે નવસારી મહાનગરપાલિકા સહિત જિલ્લા તંત્ર દ્વારા સમગ્ર શહેર અને જિલ્લાના વિવિધ વિસ્તારોમાં સ્વચ્છતા અભિયાન હાથ ધરવામાં આવ્યું છે.

શહેરમાં મોટા પાયે સાફ-સફાઈની કામગીરી ચાલી રહી છે, પરંતુ નવસારી મહાનગરપાલિકાની પોતાની કચેરીના શૌચાલયમાં જ ગંદકી અને દુર્ગંધની સ્થિતિ જોવા મળતા તંત્રની કામગીરી સામે સવાલો ઊભા થયા છે.

શહેરમાં સ્વચ્છતાના બણગા ફૂંકતી મહાનગરપાલિકા પોતાની જ કચેરીમાં સ્વચ્છતા જાળવવામાં નિષ્ફળ રહી હોવાના આક્ષેપો થઈ રહ્યા છે. પ્રજાને સ્વચ્છતાના પાઠ ભણાવતા અધિકારીઓ અને શાસકો પોતાની કચેરીમાં જ યોગ્ય સફાઈ ન રાખતા લોકોમાં નારાજગી જોવા મળી રહી છે.

આ સ્થિતિને લઈને લોકો દ્વારા મહાનગરપાલિકા પહેલા પોતાની કચેરી અને પરિસરમાં સ્વચ્છતા સુનિશ્ચિત કરે અને ત્યારબાદ શહેરમાં સ્વચ્છતા અંગેનો સંદેશ આપે તેવી માંગ ઉઠી છે.