રોજિંદા મુસાફરો માટે મેમુ ટ્રેનની ફ્રિકવન્સી વધારવાની માંગ ઉગ્ર બની

પીક અવર્સમાં ભારે ભીડથી નોકરિયાતો-વિદ્યાર્થીઓ પરેશાન, રેલવે અધિકારીઓ અને સાંસદને ઈ-મેલ અભિયાન શરૂ

નવસારી : નવસારી રેલવે સ્ટેશનથી રોજ હજારો મુસાફરો મુસાફરી કરી રહ્યા છે. ખાસ કરીને સુરત અને વલસાડ તરફ નોકરીયાત વર્ગ રોજ ટ્રેનમાં અપડાઉન કરે છે. છેલ્લા કેટલાક સમયથી મુસાફરોની સંખ્યામાં વધારો થયો છે, પરંતુ ટ્રેનોની સંખ્યામાં વધારો ન થતાં મુસાફરી વધુ જોખમી અને અસહ્ય બની રહી છે.

પીક અવર્સ દરમિયાન ટ્રેનોમાં સર્જાતી ભારે ભીડ અને અપૂરતી ફ્રિકવન્સીને કારણે નોકરીયાતો અને વિદ્યાર્થીઓને ભારે હાલાકીનો સામનો કરવો પડી રહ્યો છે. આ મુદ્દે મુસાફરોએ રેલવે તંત્રને વારંવાર મૌખિક રજૂઆતો કરી હોવા છતાં સંતોષકારક કાર્યવાહી ન થતાં મુસાફરોમાં રોષ જોવા મળી રહ્યો છે.

સમસ્યાના કાયમી નિરાકરણ માટે રોજ અપડાઉન કરતા મુસાફરો માટે મેમુ ટ્રેનની ફ્રિકવન્સી તાત્કાલિક ધોરણે વધારવાની માંગ સાથે રેલવે અધિકારીઓ અને સાંસદને ઈ-મેલ મોકલવાની શરૂઆત કરવામાં આવી છે.

મુસાફરો ઘેટાં-બકરાની જેમ મુસાફરી કરવા મજબૂર : હેમંતભાઈ

ટ્રેનમાં મુસાફરી કરતા હેમંતભાઈએ જણાવ્યું હતું કે, રોજિંદા અપડાઉન કરતા મુસાફરો ટ્રેનમાં ભારે ભીડ વચ્ચે મુસાફરી કરવા મજબૂર બન્યા છે. મેમુ ટ્રેનની ફ્રિકવન્સી વધારવા માટે રેલવે અધિકારીઓને સતત ઈ-મેલ મોકલવામાં આવી રહ્યા છે અને સોશિયલ મીડિયા પર પણ ઝુંબેશ ચલાવવાની તૈયારી છે.

તેમણે વધુમાં જણાવ્યું કે જો રેલવે તંત્ર દ્વારા આ ગંભીર મુદ્દે વહેલી તકે સંતોષકારક પગલાં લેવામાં નહીં આવે તો મુસાફરો દ્વારા રેલવે વિભાગને ઘેરવા સહિતની ઉગ્ર કાર્યવાહી કરવાની ફરજ પડી શકે છે.