નવસારીમાં સમસ્ત દંતાણી દેવીપૂજક સમાજ દ્વારા જન્માષ્ટમીની ભવ્ય ઉજવણી

દશેરા ટેકરીથી ફુવારા સુધી ભવ્ય શોભાયાત્રા, ગરબા અને મધરાતે શ્રીકૃષ્ણ જન્મોત્સવની ઉજવણી

નવસારી : નવસારી સમસ્ત દંતાણી દેવીપૂજક સમાજ દ્વારા શ્રીકૃષ્ણ જન્મોત્સવની ભારે ઉત્સાહ અને ધામધૂમથી ઉજવણી કરવામાં આવી હતી. આ મહોત્સવમાં સ્થાનિક ભક્તો ઉપરાંત સમગ્ર ગુજરાતભરમાંથી મોટી સંખ્યામાં દેવીપૂજક સમાજના લોકો ઉપસ્થિત રહ્યા હતા.

રવિવારે દશેરા ટેકરીથી ફુવારા સુધી ડીજેના તાલ અને વાજતે-ગાજતે ભવ્ય શોભાયાત્રા (વરઘોડો) કાઢવામાં આવી હતી. ફુવારા ખાતે આકર્ષક મંડપ ડેકોરેશન વચ્ચે સાંજે ડીજેના તાલે ગરબાનું આયોજન કરવામાં આવ્યું હતું, જેમાં સમાજના યુવાનો અને મહિલાઓ ઉત્સાહભેર જોડાયા હતા.

રાત્રે 12 વાગ્યે ઢોલ-નગારાના નાદ સાથે શ્રીકૃષ્ણ જન્મોત્સવની ભક્તિભાવપૂર્વક ઉજવણી કરવામાં આવી હતી. ત્યારબાદ બપોરે 1 વાગ્યે ફુવારાથી ટાવર રોડ અને ટાટા હાઇસ્કૂલ થઈને વેરાવળ નદી સુધી વિસર્જન યાત્રા યોજાઈ હતી.

વેરાવળ નદી ખાતે હજારો ભક્તોની ઉપસ્થિતિમાં રાધા-કૃષ્ણની પ્રતિમાનું ભાવપૂર્વક વિસર્જન કરવામાં આવ્યું હતું. સમગ્ર કાર્યક્રમનું સુચારુ આયોજન સમસ્ત દંતાણી દેવીપૂજક સમાજ દ્વારા સફળતાપૂર્વક કરવામાં આવ્યું હતું.