ખેરગામની ગ્રામસભામાં બાયપાસ રોડને લઇ ચાલેલી ચર્ચાને પગલે સ્થાનિક પ્રશ્નોની ચર્ચા જ ન થઇ

ચીખલી-ખેરગામ-ધરમપુર બાયપાસ રોડમાં થનારા જમીન સંપાદનનો મુદ્દો ગ્રામસભામાં ગરમાયો

ખેરગામ : ગાંધી જયંતીના અવસરે ખેરગામ ગ્રામ પંચાયતના કોમ્યુનિટી હોલ ખાતે સરપંચ ઝરણાબેન પટેલના અધ્યક્ષસ્થાને ખાસ ગ્રામસભાનું આયોજન કરવામાં આવ્યું હતું. ગ્રામસભામાં ચીખલી-ખેરગામ-ધરમપુર બાયપાસ રોડના નવા અલાઈનમેન્ટ અને તેના માટે થનારા જમીન સંપાદનના મુદ્દે ચર્ચા થતાં વાતાવરણ તંગ બન્યું હતું. અસરગ્રસ્ત ખેડૂતો દ્વારા જમીન સંપાદન સામે ઉગ્ર વિરોધ નોંધાવવામાં આવ્યો હતો.

ગ્રામસભાના એજન્ડા મુજબ બાયપાસ રોડના નવા અલાઈનમેન્ટ માટે જમીન સંપાદન અંગે ચર્ચા શરૂ થતાં અસરગ્રસ્ત ખેડૂતો દ્વારા પોતાની રજૂઆતો કરવામાં આવી હતી. ખેડૂતોએ પોતાની જમીન સંપાદન અંગે વાંધા રજૂ કરી સરકાર સમક્ષ યોગ્ય વળતર સહિતના મુદ્દાઓ પર વિચાર કરવા માંગ કરી હતી. જમીન સંપાદન મુદ્દે લાંબી ચર્ચા અને ઉગ્ર રજૂઆતો થતાં ગ્રામસભામાં અન્ય મહત્વના સ્થાનિક પ્રશ્નોની ચર્ચા માટે પૂરતો સમય મળી શક્યો નહોતો.

ગ્રામજનો દ્વારા અગાઉથી રજૂ કરવામાં આવેલા પ્રશ્નોમાં પીવાના પાણીની સમસ્યા, ટ્રાફિકની સમસ્યા, ગટર લાઈન અંગેનો વિવાદ, સ્ટ્રીટ લાઈટ તથા કચરા વ્યવસ્થાપન જેવા પ્રશ્નોનો સમાવેશ થતો હતો. પરંતુ બાયપાસના મુદ્દે ચર્ચા લાંબી ચાલતાં આ પ્રશ્નો અંગે વિગતવાર ચર્ચા થઈ શકી ન હતી.

ચીખલી-ખેરગામ-ધરમપુર બાયપાસના જમીન સંપાદન મુદ્દે અસરગ્રસ્ત ખેડૂતોમાં બે મત જોવા મળ્યા હતા. કેટલાક ખેડૂતો યોગ્ય વળતર મળે તો જમીન આપવા અંગે વિચારણા કરી રહ્યા છે, જ્યારે કેટલાક ખેડૂતો પોતાની જમીન આપવા તૈયાર નથી. સમગ્ર મામલે અસરગ્રસ્ત ખેડૂતોની રજૂઆતો વધુ વિગતવાર સાંભળવા માટે ફરીથી બેઠક યોજવાની રજૂઆત કરવામાં આવી હતી. આ બેઠકમાં માત્ર જમીન સંપાદનથી અસરગ્રસ્ત ખેડૂતોને બોલાવી ચર્ચા કરવા ગ્રામ પંચાયતને જણાવાયું હતું.

ગ્રામસભાના એજન્ડા મુજબ સાયબર સુરક્ષા અંગે જાગૃતિ કાર્યક્રમ પણ યોજાયો હતો. ખેરગામ પોલીસ મથકના પી.આઈ. પીનલ ચૌધરીએ ગ્રામજનોને સાયબર ક્રાઈમથી બચવા માટે જરૂરી સાવચેતી અંગે માર્ગદર્શન આપ્યું હતું. ઓનલાઈન છેતરપિંડીથી બચવા અજાણી લિંક પર ક્લિક ન કરવા તેમજ ઓટીપી, બેંકિંગ વિગતો અને વ્યક્તિગત માહિતી કોઈ સાથે શેર ન કરવા અંગે સમજ આપવામાં આવી હતી.