મહેસૂલી કર્મચારીઓની પડતર માંગણીઓ મુદ્દે ડાંગ જિલ્લા મંડળની સરકારને રજૂઆત

બદલીમાં થયેલા અન્યાય અને વધારાની કામગીરી સામે કર્મચારીઓમાં રોષ, માંગણીઓ નહીં સંતોષાય તો આંદોલનની ચીમકી

ડાંગ : ડાંગ જિલ્લામાં મહેસૂલી કર્મચારીઓની બદલી, બઢતી અને વધારાની કામગીરી સહિતના વિવિધ પડતર પ્રશ્નોને લઈને ડાંગ જિલ્લા મહેસૂલી કર્મચારી મંડળ (વર્ગ-3), આહવા દ્વારા રાજ્ય સરકાર સમક્ષ રજૂઆત કરવામાં આવી છે.

મંડળ દ્વારા મુખ્યમંત્રી, મહેસૂલ મંત્રી તથા મહેસૂલ વિભાગના ઉચ્ચ અધિકારીઓને કરાયેલી રજૂઆતમાં જણાવાયું છે કે મહેસૂલ વિભાગ દ્વારા મહેસૂલી કર્મચારીઓને વિવિધ પ્રકારની કામગીરી સોંપવામાં આવી રહી છે, જેના કારણે કર્મચારીઓ પર કામનું ભારણ વધી રહ્યું છે. ખાસ કરીને ઈ-ધરા, ડિજિટલ ગુજરાત, સુગમ સહિતના પોર્ટલની કામગીરી તેમજ ઓટીપી અને થંભ/બાયોમેટ્રિક આધારિત કામગીરીને કારણે કર્મચારીઓ માનસિક તણાવ અનુભવી રહ્યા હોવાનો આક્ષેપ કરવામાં આવ્યો છે.

મંડળે મહેસૂલી તલાટીઓના જોબ ચાર્ટમાં અન્ય વિભાગોની કામગીરી સામેલ કરવાના નિર્ણય સામે પણ વાંધો વ્યક્ત કર્યો છે. કર્મચારીઓના જણાવ્યા મુજબ તેમની મૂળ મહેસૂલી કામગીરી ઉપરાંત વધારાની જવાબદારીઓ સોંપવામાં આવતા નિયમિત કામગીરી પર પણ અસર પડી રહી છે.

રજૂઆતમાં બદલી અને બઢતીમાં થયેલા અન્યાયને દૂર કરવા, વર્ષ 2020ના રી-એડજસ્ટમેન્ટ ડેટનો લાભ આપવા, નવી ભરતી પહેલાંથી ફરજ બજાવતા કર્મચારીઓને મામલતદાર સંવર્ગમાં તક આપવા તેમજ 2021 બાદની બઢતી અને નિમણૂક સંબંધિત પ્રશ્નોનો ઉકેલ લાવવાની માંગ કરવામાં આવી છે.

આ ઉપરાંત જિલ્લા કક્ષાએ કર્મચારીઓની બદલીમાં પારદર્શિતા જાળવવા, જરૂરી જગ્યાઓ ખાલી રાખીને બદલીના હુકમો ન કરવા તથા કર્મચારીઓની સિનિયોરિટી અને હક-હિતને ધ્યાનમાં રાખીને નિર્ણય લેવા પણ માંગ કરવામાં આવી છે.

દરમિયાન ગુજરાત રાજ્ય મહેસૂલી કર્મચારી મહામંડળ દ્વારા રાજ્યવ્યાપી ‘વર્ક ટુ રુલ’ કાર્યક્રમ જાહેર કરવામાં આવ્યો છે. મહેસૂલી તલાટી સહિતના કર્મચારીઓ નવા જોબ ચાર્ટ તથા અન્ય પડતર પ્રશ્નો સામે વિરોધ નોંધાવી રહ્યા છે.

ડાંગ જિલ્લા મહેસૂલી કર્મચારી મંડળે સ્પષ્ટતા કરી છે કે કર્મચારીઓની રજૂઆતોનો યોગ્ય ઉકેલ નહીં આવે તો આગામી દિવસોમાં સંગઠનાત્મક રીતે વધુ કડક કાર્યક્રમો હાથ ધરવામાં આવી શકે છે. રાજ્યવ્યાપી આંદોલન અંતર્ગત 10 સપ્ટેમ્બરથી હડતાળની ચીમકી પણ આપવામાં આવી છે.

હવે મહેસૂલ વિભાગ કર્મચારીઓની પડતર માંગણીઓ અંગે શું નિર્ણય લે છે અને આગામી દિવસોમાં આ મુદ્દો કયા સ્વરૂપે આગળ વધે છે તેના પર સૌની નજર રહેશે.