રાજ્યના નાયબ મુખ્યમંત્રીના ફોટા અને ખોટા નિવેદન સાથેની પોસ્ટ સોશ્યલ મીડિયામાં મુકનાર ઝડપાયો

નવસારી : રાજ્યના નાયબ મુખ્યમંત્રીના ફોટા અને ખોટા નિવેદન સાથેની પોસ્ટ સોશ્યલ મીડિયા ઈનસ્ટાગ્રામ પર મુકતા નવસારી સાયબર ક્રાઈમ પોલીસે ઈનસ્ટાગ્રામ આઈડી ધારક વિરુદ્ધ ફરિયાદ નોંધી હતી. જે પોસ્ટ મુકનાર આરોપીને નવસારી એલ.સી.બી. પોલીસે ઝડપી પાડી આગળની કાર્યવાહી હાથ ધરી છે.

નવસારી સાયબર ક્રાઈમ પોલીસે ઈનસ્ટાગ્રામ આઈડી ધારક વિરુદ્ધ ફરિયાદ નોંધી હતી

નવસારી સાયબર ક્રાઈમ પોલીસ સ્ટેશન દ્વારા સોશ્યલ મીડિયા મોનીટરીંગ દરમિયાન ઈનસ્ટાગ્રામ પ્લેટફોર્મ ઉપર "katha_vistar" નામની ઈનસ્ટાગ્રામ આઈડી પરથી ગુજરાત રાજ્યના નાયબ મુખ્યમંત્રી હર્ષ સંઘવીના ફોટાનો ઉપયોગ કરી, તેમના દ્વારા નિવેદન આપવામાં આવેલ હોય તેવો ખોટો અર્થ ઉપજાવે તેવી ખોટી અને બનાવતી ઈલેક્ટ્રોનિક પોસ્ટ પ્રસિદ્ધ કરવામાં આવી હોવાનું ધ્યાને આવ્યું હતું. આ પોસ્ટમાં દારૂના ગેરકાયદેસર વેચાણ તથા સરપંચ, કોર્પોરેટર, એમએલએ અંગેના બનાવતી લખાણનો ઉપયોગ કરી નાયબ મુખ્યમંત્રીની પ્રતિષ્ઠાને હાની પહોંચે તે રીતે ખોટા ઈલેક્ટ્રોનિક લખાણ લખેલ પોસ્ટને સોશ્યલ મીડિયા ઉપર ન્યુઝના સ્વરૂપમાં પ્રસિદ્ધ કરવામાં આવ્યું હોવાનું જણાયું હતું. જેથી નવસારી સાયબર ક્રાઈમ પોલીસે ઈનસ્ટાગ્રામ આઈડી ધારક/ઉપયોગકર્તા વિરુદ્ધ ગુનો નોંધ્યો હતો.

આ બાબતે નવસારી સાઈબર ક્રાઈમ પોલીસ તેમજ નવસારી લોકલ ક્રાઈમ બ્રાંચ દ્વારા તપાસ શરુ કરવામાં આવી હતી. દરમિયાન નવસારી એલ.સી.બી. પોલીસે ટેકનીકલ તથા વૈજ્ઞાનિક પુરાવાના આધારે ઈનસ્ટાગ્રામ આઈ.ડી. "katha_vistar" ના ધારક તથા ઉપયોગકર્તા અને ગણદેવી ખાપરવાડા વણગામ મહાદેવ ફળીયામાં રહેતા હાર્દિક રામજીભાઈ પટેલ હોવાનું જણાતા પોલીસે હાર્દિકને ઝડપી પાડયો હતો. પોલીસે હાર્દિકની પૂછપરછ કરતા તેણે હાલની સોશ્યલ મીડિયા ટ્રેન્ડમાં લોકોનું ધ્યાન આકર્ષવા, સોશ્યલ મીડિયા પર ફોલોઅર્સ વધારવા અને પ્રસિદ્ધી મેળવવાના હેતુથી આ પ્રકાશની પોસ્ટ કરી હોવાનું જણાવ્યું હતું. આ બાબતે આગળની કાર્યવાહી માટે આરોપી હાર્દિકને નવસારી સાયબર ક્રાઈમ પોલીસ મથકે સોંપવામાં આવ્યો છે.