નવસારીમાં ઈદે મિલાદની ભવ્ય ઉજવણી

નવસારી: હઝરત મોહમ્મદ પયગંબર સાહેબના જન્મદિન ઈદે મિલાદ-ઉન-નબીની સમગ્ર નવસારી શહેરમાં ભારે અકીદત, ઉત્સાહ અને ભક્તિભાવપૂર્વક ઉજવણી કરવામાં આવી હતી. માનવતા, શાંતિ, દયા અને સદ્ભાવનાનો સંદેશ આપતા આ પાવન પર્વ નિમિત્તે શહેરમાં વિવિધ વિસ્તારોમાંથી ભવ્ય જુલૂસનું આયોજન કરવામાં આવ્યું હતું.

દારૂલ ઉલૂમ અન્વારે રઝા સંસ્થા દ્વારા પરંપરાગત રીતે ઐતિહાસિક મોટી દરગાહ મસ્જિદથી દારૂલ ઉલૂમ અન્વારે રઝા મદ્રેસા સુધી એક શાનદાર જુલૂસ કાઢવામાં આવ્યું હતું. આ ઉપરાંત, ઘેલખડીથી રિંગરોડ સુધી પણ વિશાળ જુલૂસનું આયોજન થયું હતું. જેમાં હજારોની સંખ્યામાં મુસ્લિમ સમાજના બિરાદરો ઉમંગભેર જોડાયા હતા. સમગ્ર માર્ગો નાત-એ-પાકની ગુંજથી ગૂંજી ઊઠ્યા હતા.

જુલૂસનું સમાપન દારૂલ ઉલૂમ અન્વારે રઝા સંચાલિત રોયલ ઈંગ્લિશ મીડિયમ સ્કૂલ ખાતે થયું હતું. આ કાર્યક્રમ દરમિયાન ઉપસ્થિત પોલીસ તંત્રના ઉચ્ચ અધિકારીઓ તેમજ આમંત્રિત મહાનુભાવોનું ઉત્સાહભેર ભવ્ય સ્વાગત અને સન્માન કરવામાં આવ્યું હતું.

આ કાર્યક્રમના અંતે પયગંબર સાહેબના આદર્શો અને જીવનમૂલ્યો પર ચાલવાનો સંકલ્પ લઈ દેશમાં અમન-શાંતિ, પરસ્પર ભાઈચારો અને કોમી એકતા કાયમ રહે તે માટે સામૂહિક વિશેષ દુઆ માંગવામાં આવી હતી. આ ઉત્સવને પગલે સમગ્ર શહેરનું વાતાવરણ પવિત્ર અને ઉત્સાહમય બની ગયું હતું.