નવસારીમાં તહેવાર ટાણે ખાદ્ય સુરક્ષા વિભાગ દ્વારા હોટલ-રેસ્ટોરન્ટ અને માવા-મીઠાઈની દુકાનોમાં તપાસ કરાઈ

નવસારી : નવસારી જિલ્લામાં ખાદ્ય પદાર્થોની ગુણવત્તા અને ખાદ્ય સુરક્ષા જળવાઈ રહે તે હેતુસર ખાદ્ય સુરક્ષા વિભાગ દ્વારા હોટલ/રેસ્ટોરન્ટ તેમજ રક્ષાબંધન તહેવારને અનુલક્ષીને મીઠાઈ અને માવાની દુકાનોમાં સઘન તપાસ હાથ ધરવામાં આવી રહી છે.

31 ખાદ્ય સંસ્થાઓની તપાસ | 57 ખાદ્ય પદાર્થોનું ટેસ્ટિંગ | ₹14,618નો 57.5 કિગ્રા જથ્થો નાશ

આ કામગીરી અંતર્ગત ખારેલ અને નોગામા વિસ્તારમાં કુલ 21 પેઢીઓની તપાસ કરવામાં આવી હતી. તપાસ દરમિયાન અંદાજે ₹7,498નો કુલ 46.5 કિગ્રા અયોગ્ય/અસુરક્ષિત ખાદ્ય જથ્થો નાશ કરાવવામાં આવ્યો હતો. તેમજ કુલ 30 ખાદ્ય પદાર્થોનું ટેસ્ટિંગ કરવામાં આવ્યું હતું, જેમાં 20 હોટેલ/રેસ્ટોરન્ટ તથા 10 કરિયાણા સ્ટોરનો સમાવેશ થાય છે.

તે જ રીતે ચીખલીના રાનકુવા વિસ્તારમાં કુલ 10 ખાદ્ય પેઢીઓની તપાસ કરવામાં આવી હતી. આ તપાસ દરમિયાન અંદાજે ₹7,120નો 11 કિગ્રા ખાદ્ય જથ્થો નાશ કરાવવામાં આવ્યો હતો. આ ઉપરાંત કુલ 32 ખાદ્ય પદાર્થોનું ટેસ્ટિંગ કરવામાં આવ્યું હતું, જેમાંથી 11 સર્વેલન્સ સેમ્પલ લેવામાં આવ્યા હતા.

આ ઉપરાંત ફૂડ સેફટી ઓન વ્હીલ દ્વારા સ્થળ પર જ ખાદ્ય પદાર્થોનું ઓન-ધ-સ્પોટ ટેસ્ટિંગ કરવામાં આવ્યું હતું, જેથી ખાદ્ય પદાર્થોની ગુણવત્તાની તાત્કાલિક ચકાસણી કરી શકાય.

વિવિધ વિસ્તારોમાં કરેલી તપાસની કામગીરી દરમિયાન કુલ 31 ખાદ્ય સંસ્થાઓની તપાસ, 57 ખાદ્ય પદાર્થોનું ટેસ્ટિંગ તથા અંદાજે ₹14,618નો 57.5 કિગ્રા ખાદ્ય જથ્થો નાશ કરાવવામાં આવ્યો છે.

ખાદ્ય સુરક્ષા વિભાગ દ્વારા તહેવાર દરમિયાન તેમજ આગામી દિવસોમાં પણ તપાસ, સેમ્પલિંગ અને સ્થળ પર ટેસ્ટિંગની કામગીરી સતત ચાલુ રાખવામાં આવશે તથા ખાદ્ય સુરક્ષા અને સ્વચ્છતાના નિયમોનું ઉલ્લંઘન કરનાર સામે નિયમોનુસાર કાયદેસરની કાર્યવાહી કરવામાં આવશે.