ટેકનો પ્લસ એપના લાઈવ ફોટો સેલ્ફીના નિયમ સામે નવસારી જિલ્લા પંચાયતના આરોગ્ય કર્મીનો વિરોધ

નવસારી : નવસારી જિલ્લા પંચાયતના આરોગ્ય કર્મીઓએ ટેકનો પ્લસ એપના લાઈવ ફોટો સેલ્ફીના નિયમનો વિરોધ કરી ઓનલાઈન કામગીરી માટે નવા સ્માર્ટફોન અને ઈન્ટરનેટ ભથ્થું આપવાની માંગ કરી છે.

સરકાર દ્વારા આરોગ્યલક્ષી સર્વે અને કામગીરી માટે ટેકનો પ્લસ એપ ઉપયોગમાં લેવાય છે. જેમાં આરોગ્ય કર્મચારીઓને લાભાર્થીઓ અને દર્દીઓ સાથેના લાઈવ ફોટોગ્રાફ-સેલ્ફી અપલોડ કરવાની સૂચના આપવામાં આવી છે.

આ બાબતે આરોગ્ય કર્મચારીઓના જણાવ્યા મુજબ, ફિલ્ડ પર કામગીરી દરમિયાન ટેકનો પ્લસ એપના ઉપયોગને લીધે કામગીરીમાં મુશ્કેલી ઉભી થઈ રહી છે. જેથી રાજ્યના ૩૪ જિલ્લાઓમાં વહીવટી તંત્ર અને ગાંધીનગર ખાતે મંત્રીઓને રજૂઆત કરી હતી.

આરોગ્ય કર્મચારીઓ તેમના અંગત સ્માર્ટફોનમાં થર્ડ પાર્ટી એપ્લિકેશન ડાઉનલોડ કરીને સરકારી કામગીરી કરવાની ફરજ સામે નારાજગી વ્યક્ત કરી હતી. સાથે જ પોતાની અંગત માહિતી અને ડેટા લીક થવાનો ભય પણ છે.

વર્ષ 2017 માં સરકાર તરફથી આપવામાં આવેલા મોબાઈલ હવે ઉપયોગમાં લેવાની સ્થિતિમાં નથી. જેથી ઓનલાઈન કામગીરી માટે નવા સ્માર્ટફોન અને ઈન્ટરનેટ ભથ્થું આપવાની માંગ કરી હતી.

વધુમાં આરોગ્ય કર્મચારીઓએ ત્રણેક મહિના પહેલા વહીવટી કારણો દર્શાવીને 243 આરોગ્ય કર્મીઓ અને 34 ફાર્માસિસ્ટની સામુહિક બદલી કરવામાં આવી હોવાનો મુદ્દો પણ ડીડીઓ સમક્ષ ઉઠાવ્યો હતો.

જે બાબતે કર્મચારી મંડળ અને ડીડીઓ વચ્ચે બેઠક યોજાઈ હતી. જેમાં બદલીઓના ઓર્ડર રીવાઈઝ કરી કર્મચારીઓને મૂળ સ્થાને મુકવા અંગે વહીવટી તંત્ર તરફથી હકારાત્મક ખાતરી આપવામાં આવી હોવાનું જણાવ્યું હતું.