નવસારી ખેડૂત મંડળીની 74મી સભામાં ખેડૂત હિતના નિર્ણયો

નવસારી : શ્રી નવસારી ખેડૂત સહકારી સોસાયટી લિ.ની 74મી વાર્ષિક સાધારણ સભા સંસ્થાના પ્રમુખ મહેશભાઈ બાબુભાઈ પટેલ (લીમધા)ના અધ્યક્ષસ્થાને સંપન્ન થઈ હતી.

જેમાં તેમણે સ્પષ્ટ ભારપૂર્વક જણાવ્યું હતું કે, સહકારી પ્રવૃત્તિ માત્ર આર્થિક મૉડલ પૂરતી મર્યાદિત નથી પરંતુ સુદૃઢ સામાજિક અને સાંસ્કૃતિક શ્રદ્ધાનું પ્રતીક છે.

સંસ્થા 74 વર્ષની ગૌરવપૂર્ણ મજલ પૂરી કરી 75મા અમૃત વર્ષમાં પ્રવેશી રહી છે. ત્યારે 75 વર્ષ પૂર્ણ કરી ચૂકેલા વરિષ્ઠ સભાસદોનું શાલ તેમજ પુષ્પગુચ્છ અર્પણ કરી વિશેષ બહુમાન કરવામાં આવ્યું હતું.

સભા દરમિયાન પ્રમુખ મહેશભાઈએ વર્તમાન સહકારી માળખું અને ખેડૂતોને સ્પર્શતી પાયાની સમસ્યાઓ અંગે ગહન સમીક્ષા કરી હતી. તેમજ વર્ષ 2025-26ના વાર્ષિક હિસાબોને ઉપસ્થિત સભાસદોએ એક અવાજે સર્વાનુમતે મંજૂરી આપી હતી.

સંસ્થાના 75મા અમૃત મહોત્સવની ઉજવણી નિમિત્તે સમગ્ર કાર્યક્ષેત્રના ગામોમાં ટૂંક સમયમાં નેત્રયજ્ઞ, સર્વરોગ નિદાન અને રક્તદાન કેમ્પ જેવા જનહિતલક્ષી સેવાકીય આયોજનો કરવાની મહત્ત્વપૂર્ણ જાહેરાત કરાઈ હતી.

આ પ્રસંગે ઉપપ્રમુખ જશુભાઈ નાયકે મંડળીની પ્રગતિશીલ કામગીરીને બિરદાવી રચનાત્મક સૂચનો કર્યા હતા.

જ્યારે સમગ્ર સાધારણ સભાનું સુચારુ સંચાલન સંસ્થાના મેનેજર પ્રફુલભાઈ પટેલ દ્વારા કરવામાં આવ્યું હતું.