નવસારી મ્યુનિસિપલ કમિશનરે ICCC પબ્લિક લાયબ્રેરી, વસંત વિહાર (યોગા સેન્ટર), ઇટાળવા (WTP પ્લાન્ટ) અને ગાંધી સ્મૃતિ બ્રીજ ખાતે ચાલતા વિવિધ વિકાસ કાર્યોની રૂટિન ફિલ્ડ વિઝીટ કર્યું

નવસારી : નવસારી મહાનગરપાલિકાના કમિશનર જયેશ ઉપાધ્યાય દ્વારા શહેરમાં ચાલી રહેલા વિવિધ પ્રજાલક્ષી અને વિકાસલક્ષી કાર્યોની રૂટિન ફિલ્ડ વિઝીટ કરવામાં આવી હતી. આ મુલાકાતનો મુખ્ય હેતુ શહેરમાં ચાલી રહેલી વિવિધ કામગીરીઓની પ્રગતિનું પ્રત્યક્ષ નિરીક્ષણ કરવાનો અને વિકાસ કાર્યો સમયસર તેમજ ઉચ્ચ ગુણવત્તા સાથે પૂર્ણ થાય તે સુનિશ્ચિત કરવાનો હતો. કમિશનરે સ્થળ પર જઈને સંબંધિત અધિકારીઓ તથા એજન્સીઓ સાથે સીધી ચર્ચા કરી હતી અને કામગીરીની વિસ્તૃત વિગતો મેળવી હતી. નવસારીની જનતાને આ તમામ આધુનિક સુવિધાઓનો સત્વરે લાભ મળી શકે તે માટે વહીવટી તંત્ર સજાગ છે અને આ પ્રકારની મુલાકાતોથી કામગીરીમાં પારદર્શિતા તેમજ ઝડપ આવે છે.

આ ફિલ્ડ વિઝીટ દરમિયાન કમિશનરે સૌપ્રથમ ICCC પબ્લિક લાયબ્રેરી સેન્ટર ખાતે ચાલતી કામગીરીનું ઝીણવટભર્યું નિરીક્ષણ કર્યું હતું. વિદ્યાર્થીઓ અને નાગરિકો માટે આ લાયબ્રેરી અત્યંત ઉપયોગી નીવડશે તે હેતુથી તેમણે લાયબ્રેરીની ડિઝાઇનમાં કેટલાક અગત્યના અને પ્રજાલક્ષી ફેરફારો સૂચવ્યા હતા. જેમાં ખાસ કરીને બુક સ્ટોર, રીડિંગ એરિયા અને વેટિંગ એરિયાને વધુ સુવિધાજનક અને આકર્ષક બનાવવા પર ભાર મૂક્યો હતો. ત્યારબાદ તેમણે વસંત વિહાર ખાતે નિર્માણાધીન યોગા સેન્ટરની મુલાકાત લીધી હતી. આ યોગા સેન્ટરની કામગીરી લગભગ 90 ટકા જેટલી પૂર્ણ થઈ ચૂકી છે. કમિશનરે બાકી રહેલી પ્લાન્ટેશન (વૃક્ષારોપણ)ની કામગીરી સત્વરે પૂર્ણ કરી, આ સ્વાસ્થ્યવર્ધક કેન્દ્રને વહેલામાં વહેલી તકે જાહેર જનતાના ઉપયોગ અર્થે ખુલ્લું મૂકવા માટે સંબંધિત વિભાગને કડક સૂચનો આપ્યા હતા.

શહેરમાં માળખાગત સવલતો અને ખાસ કરીને શુદ્ધ પીવાના પાણીની સુવિધાને વધુ સુદ્રઢ કરવાના ભાગરૂપે કમિશનરે ઇટાળવા ખાતે જીયુડીસી દ્વારા નિર્માણ પામી રહેલા વિશાળ વોટર ટ્રીટમેન્ટ પ્લાન્ટની કામગીરીનું પણ નિરીક્ષણ કર્યું હતું. આ પ્લાન્ટ નવસારી શહેરની ભવિષ્યની પાણીની જરૂરિયાતોને પહોંચી વળવા માટે અત્યંત મહત્વપૂર્ણ પ્રોજેક્ટ છે. આ ઉપરાંત તેમણે પાણીના સુવ્યવસ્થિત સંગ્રહ અને વિતરણ માટે ગાંધી સ્મૃતિ બ્રીજ પાસે ચાલી રહેલી એલિવેટેડ સ્ટોરેજ રિઝર્વાયર અને અંડરગ્રાઉન્ડ સ્ટોરેજ રિઝર્વાયર સંપની કામગીરીની પણ સ્થળ તપાસ કરી હતી અને કામગીરીની ઝડપ વધારવા માટે તાકીદ કરી હતી.

મ્યુનિસિપલ કમિશનરની આ રૂટિન પરંતુ અસરકારક વિઝીટથી મહાનગરપાલિકાના વહીવટી તંત્રમાં અને ચાલતા વિકાસ કાર્યોમાં નવી ગતિ આવશે. આગામી દિવસોમાં આ તમામ પ્રોજેક્ટ્સનું લોકાર્પણ થતાં શહેરની જનતાને શિક્ષણ, સ્વાસ્થ્ય અને પીવાના પાણી જેવી પ્રાથમિક સુવિધાઓનો એક નવો અનુભવ પ્રાપ્ત થશે.