નવસારી અને વલસાડમાં ગુજરાત રાજ્ય બાળ અધિકાર સંરક્ષણ આયોગના અધ્યક્ષ દ્વારા સમીક્ષા બેઠક યોજાઈ

બાળકોના વિરૂદ્ધ ગુનાઓ, અત્યાચાર અને શોષણના કિસ્સામાં હેલ્પલાઇન નંબર ૧૧૨ પર સંપર્ક કરવા અનુરોધ કરાયો

નવસારી, વલસાડ : બાળકોના અધિકારીનું રક્ષણ સુનિશ્ચિત કરવાના ઉદ્દેશથી ગુજરાત રાજ્ય બાળ અધિકાર સંરક્ષણ આયોગના અધ્યક્ષા ધર્મિષ્ઠાબેન ગજ્જરના અધ્યક્ષસ્થાને નવસારી અને વલસાડમાં સમીક્ષા બેઠક યોજાઈ હતી. જેમાં નવસારી અને વલસાડ જીલ્લાના કલેકટર, નિવાસી અધિક કલેકટર અને જીલ્લા વિકાસ અધિકારી સહિત વિવિધ વિભાગીય વડાઓ ઉપસ્થિત રહ્યા હતા.

આ બેઠકમાં બાળ અધિકારોના જતન, શિક્ષણની ગુણવત્તા, આંગણવાડીઓ તેમજ આશ્રમશાળાઓમાં ઉપલબ્ધ સુવિધાઓ અંગે જીણવટભરી ચર્ચા-વિચારણા હાથ ધરવામાં આવી હતી. આ તકે આયોગના અધ્યક્ષા ધર્મિષ્ઠાબેન ગજ્જરે ભારપૂર્વક જણાવ્યું હતું કે, બાળકો પર થતા કોઈપણ પ્રકારના અત્યાચાર, શોષણ કે બાળમજૂરી જેવા બનાવો સામે ત્વરિત પગલાં ભરવા આયોગ કટિબદ્ધ છે. નાગરિકોને પણ બાળ સંરક્ષણની આ ઝુંબેશમાં સહભાગી થઈ કોઈપણ વિપરીત પરિસ્થિતિમાં હેલ્પલાઈન ૧૧૨ નો ઉપયોગ કરવા અપીલ કરવામાં આવી હતી.

બાળ સંરક્ષણ આયોગના સચિવ ડી.ડી.કાપડિયાએ બાળકોના સર્વાંગી વિકાસ માટે સરકારની યોજનાઓનો અસરકારક અમલ થાય અને દરેક બાળક સુધી તેનો લાભ પહોંચે તે માટે સતત પ્રયત્નશીલ રહેવા જણાવ્યું હતું.

નવસારી અને વલસાડ જિલ્લામાં બાળકો માટે થઈ રહેલી કામગીરીની વિગતો મેળવીને જરૂરી સુચનો કર્યા હતા. જયારે તંત્ર દ્વારા કરવામાં આવતી તમામ બાળકલ્યાણકારી પ્રવૃત્તિઓ અને બાળ પુનર્વસન ક્ષેત્રે થયેલી પ્રગતિ અંગે જિલ્લા કલેક્ટર, ડીડીઓ તેમજ અન્ય અધિકારીઓએ આયોગની ટીમને માહિતગાર કર્યા હતા.

આયોગના સભ્યો બેઠક બાદ વિવિધ બાળ સુરક્ષા અને બાળ સરક્ષણ સંબંધિત સંસ્થાઓની રૂબરૂ મુલાકાત લઈ વાસ્તવિક પરિસ્થિતિનું અવલોકન કર્યું હતું. ઉપરાંત CWC ની સમિતિ સાથે અંગત બેઠક યોજીને બાળકોના વિવિધ પ્રશ્નોની ચર્ચા કરી હતી.