નવસારી મનપામાં દાખલા મંજૂર કરવાની પ્રક્રિયામાં ફેરફાર કરાયા

જન્મ-મરણના દાખલા સમયસર મળવાની શક્યતા

નવસારી : નવસારી મહાનગરપાલિકામાં જન્મ અને મરણના દાખલા મેળવવામાં વિલંબ થવાને કારણે છેલ્લા કેટલાક સમયથી અરજદારોમાં નારાજગી સાથે ફરિયાદો કરવામાં આવી હતી. જોકે હવે મનપા દ્વારા દાખલા મંજૂર કરવાની પ્રક્રિયામાં ફેરફાર કરવામાં આવતા આગામી દિવસોમાં આ સમસ્યા હળવી થવાની શક્યતા વ્યક્ત કરવામાં આવી છે.

નવસારી મહાનગરપાલિકામાં જન્મ અને મરણના દાખલા મેળવવા માટે રોજ અરજીઓ આવે છે. પરંતુ અરજદારોને લાંબો સમય વીતી ગયા બાદ પણ જન્મ-મરણના દાખલા ન મળતા છેલ્લા કેટલાક સમયથી અરજદારોમાં મનપાની કામગીરી સામે નારાજગી જોવા મળી રહી હતી. અરજદારોએ વિધિવત અરજી કર્યા બાદ પણ એકથી બે મહિના સુધી દાખલા માટે રાહ જોવી પડતી હોવાની ફરિયાદો સામે આવી છે.

મનપા વિસ્તારમાં છેલ્લા કેટલાક સમયથી આવા અનેક કિસ્સાઓ સામે આવ્યા છે, જેમાં અરજદારોને જન્મ-મરણના દાખલા મેળવવા માટે એકથી બે મહિના સુધી રાહ જોવી પડી હોવાની ફરિયાદો કરવામાં આવી છે. ખાસ કરીને સરકારી યોજનાઓ, શૈક્ષણિક પ્રવેશ, પાસપોર્ટ, વારસાઈ સહિતની કામગીરી માટે દાખલાની જરૂરિયાત રહેતી હોવાથી વિલંબથી અરજદારોની અન્ય કામગીરી પણ અટકી જાય છે.

અગાઉ જન્મ-મરણના દાખલાને મંજૂરી આપવાની સત્તા મુખ્ય જિલ્લા આરોગ્ય અધિકારી પાસે હતી. સમગ્ર જિલ્લામાંથી આવી અરજીઓ અને કામગીરી તેમની કચેરીમાં આવતી હોવાથી મંજૂરી પ્રક્રિયામાં સ્વાભાવિક રીતે સમય લાગતો હતો. પરિણામે સ્થાનિક સ્તરે અરજી કર્યા બાદ પણ અરજદારોને લાંબી રાહ જોવી પડતી હતી.

હવે આ પ્રક્રિયામાં ફેરફાર કરવામાં આવ્યો છે. જન્મ-મરણના દાખલાને લગતી મંજૂરીની સત્તા નવસારી મનપાના મેડિકલ ઓફિસરને આપવામાં આવી છે. જેના કારણે અરજીઓની ચકાસણી અને મંજૂરીની કામગીરી સ્થાનિક સ્તરે જ ઝડપથી થઈ શકશે. મનપા તંત્રના મતે નવી વ્યવસ્થા અમલમાં આવતા ધીમે ધીમે પેન્ડિંગ અરજીઓનો નિકાલ થશે અને અરજદારોને સમયસર દાખલા મળી શકશે. ત્યારે આગામી સમયમાં જન્મ-મરણના દાખલા મેળવવામાં થતો વિલંબ ઘટે અને અરજદારોને રાહત મળે તેવી આશા સેવાઈ રહી છે.