નવસારી સખીમંડળની ૫૦ બહેનોએ વાંસદા ખાતે પ્રેરણા પ્રવાસ યોજ્યો

બે દિવસીય પ્રવાસ દરમિયાન કૃષિ આધારિત મૂલ્યવર્ધન પ્રવૃત્તિઓ અને સ્વરોજગાર અંગે માહિતી મેળવી

નવસારી : નવસારી પ્રકૃતિ કલસ્ટર સંગઠન દ્વારા એનઆરએલએમ યોજના તથા નવસારી તાલુકા પંચાયતના સહયોગથી સખીમંડળની બહેનો માટે ૬ થી ૭ ઓક્ટોબર દરમિયાન વાંસદા ખાતે બે દિવસીય પ્રેરણા પ્રવાસ યોજાયો હતો. જેમાં નવસારી તાલુકાની ૫૦ બહેનોએ ઉત્સાહપૂર્વક ભાગ લીધો હતો.

સખીમંડળની બહેનો કૃષિ આધારિત વિવિધ પ્રવૃત્તિઓ સાથે જોડાય, કૃષિ પેદાશોમાં મૂલ્યવર્ધન કરી તેનું વેચાણ વધારવા તેમજ સ્વરોજગાર થકી આવકમાં વધારો કરી શકે તે મુખ્ય ઉદ્દેશ્ય સાથે આ પ્રેરણા પ્રવાસ યોજાયો હતો.

આ પ્રેરણા પ્રવાસ દરમિયાન બહેનોએ બીએઆઈએફ સંસ્થા, વાંસદા ખાતે વિવિધ કૃષિ તથા મૂલ્યવર્ધન પ્રવૃત્તિઓની મુલાકાત લઈ પ્રત્યક્ષ માહિતી મેળવી હતી. જેમાં મશરૂમની ખેતી, મશરૂમ ઉત્પાદનની પ્રક્રિયા, તાપમાનનું સંચાલન તેમજ બજારમાં વેચાણ અંગે માર્ગદર્શન મેળવ્યું હતું.

આ ઉપરાંત વિવિધ શાકભાજી અને ફળોમાંથી અથાણાં બનાવવાની પદ્ધતિ, પેકિંગ અને માર્કેટિંગ, તેમજ મસાલા, પાપડ, વેફર, ચટણી અને જામ જેવી ફૂડ પ્રોસેસિંગ અને મૂલ્યવર્ધન પ્રવૃત્તિઓ અંગે પણ બહેનોએ માહિતી મેળવી હતી.

બહેનોએ વર્મી કમ્પોસ્ટ તથા જૈવિક ખાતર તૈયાર કરવાની ઓછા ખર્ચની પદ્ધતિ તેમજ ગુણવત્તાયુક્ત બિયારણ અને નર્સરી વ્યવસ્થાપન અંગે પણ પ્રત્યક્ષ જાણકારી મેળવી હતી. આ પ્રવાસ દરમિયાન રંગપુર પ્રાકૃતિક ફાર્મની મુલાકાત લઈને પ્રાકૃતિક ખેતી, જૈવિક ખાતર તથા જીવામૃત તૈયાર કરવાની પદ્ધતિ સહિતની વિવિધ પ્રવૃત્તિઓનું નિરીક્ષણ કરી ખેતીમાં તેના ઉપયોગ વિશે માહિતી મેળવી હતી.