નવસારીમાં સી.આર. પાટીલે ૧૮૩ લાખના ખર્ચે તૈયાર થયેલા અદ્યતન સિટી બસ પોર્ટનું લોકાર્પણ કર્યું

ગાંધી જયંતીએ નવસારીવાસીઓને પરિવહનની બેવડી ભેટ; સુવિધાસભર સિટી બસ પોર્ટ સાથે વલસાડ-સુરત નવી મેમુ ટ્રેનનો પ્રારંભ

નવસારી : નવસારી મહાનગરપાલિકા વિસ્તારમાં નાગરિકોની પરિવહન સુવિધાને વધુ સુદ્રઢ અને આધુનિક બનાવવા રેલવે સ્ટેશન નજીક અંદાજિત ૧૮૩ લાખ રૂપિયાના ખર્ચે નવનિર્મિત સિટી બસ પોર્ટનું લોકાર્પણ કરવામાં આવ્યું હતું. ગાંધી જયંતીએ આયોજિત સમારોહમાં કેન્દ્રીય જળશક્તિ મંત્રી સી.આર. પાટીલ તથા આદિજાતિ વિકાસ, ખાદી, કુટીર અને ગ્રામોદ્યોગ મંત્રી નરેશભાઈ પટેલે તકતીનું અનાવરણ કર્યું હતું. સાથે જ સિટી બસને લીલી ઝંડી આપી બસ પોર્ટને જાહેર જનતાની સેવા માટે ખુલ્લું મૂક્યું હતું.

નવા બસ પોર્ટમાં મુસાફરોની સુવિધાનું ખાસ ધ્યાન રાખવામાં આવ્યું છે. આ સંકુલમાં એકસાથે ૮ બસ પાર્ક થઈ શકે તેવી જગ્યા તૈયાર કરવામાં આવી છે. બસની રાહ જોતા ૧૦૦થી ૧૫૦ મુસાફરો આરામથી બેસી શકે તેવી બેઠક વ્યવસ્થા પણ ઊભી કરવામાં આવી છે. આ સુવિધાથી સ્ટેશન વિસ્તારમાં ટ્રાફિકનું નિયમન સરળ બનવાની અને મુસાફરોને પરિવહનની વધુ સારી સુવિધા મળવાની અપેક્ષા છે.

મુસાફરોને બસના રૂટ, સમય અને અન્ય જરૂરી માહિતી સરળતાથી મળી રહે તે માટે બસ પોર્ટ ખાતે બસના સમયપત્રક તથા પૂછપરછ બારીની સુવિધા ઉપલબ્ધ કરાવવામાં આવી છે.

નવા બસ પોર્ટના વિકાસ સાથે શહેરની ઐતિહાસિક ઓળખ જાળવવાનો પણ પ્રયાસ કરવામાં આવ્યો છે. બસ પોર્ટ પર આવેલી મહારાજા શ્રી સયાજીરાવ ગાયકવાડજીની પ્રતિમા યથાવત રાખવામાં આવી છે. સાથે જ નિર્માણ દરમિયાન શક્ય તેટલાં હયાત વૃક્ષોને જાળવી પર્યાવરણ પ્રત્યે સંવેદનશીલ અભિગમ અપનાવવામાં આવ્યો છે.

ગાંધી જયંતીએ વલસાડથી સુરત વચ્ચે દૈનિક મુસાફરી કરતા નોકરિયાતો અને વિદ્યાર્થીઓ માટે નવી મેમુ ટ્રેનની સેવાનો પણ પ્રારંભ કરવામાં આવ્યો હતો. આ ટ્રેન દરરોજ સવારે ૧૦ વાગ્યે વલસાડથી ઊપડીને સવારે ૧૧:૫૫ વાગ્યે સુરત પહોંચશે. વળતા પ્રવાસમાં સુરતથી દરરોજ સાંજે ટ્રેનની સેવા મળશે. આ સેવાથી દૈનિક મુસાફરોના સમય અને નાણાંની બચત થવાની અપેક્ષા છે.

આ પ્રસંગે નવસારી મહાનગરપાલિકાના મેયર અશોકભાઈ ધોરાજીયા, જલાલપોરના ધારાસભ્ય આર.સી. પટેલ, નવસારીના ધારાસભ્ય રાકેશભાઈ દેસાઈ, ડેપ્યુટી મેયર કેયુરીબેન દેસાઈ, સ્ટેન્ડિંગ કમિટીના અધ્યક્ષ મુકેશભાઈ અગ્રવાલ સહિતના મહાનુભાવો અને પદાધિકારીઓ ઉપસ્થિત રહ્યા હતા.

નવસારીને એકસાથે મળેલી આ બંને પરિવહન સુવિધાઓથી નવસારી-વલસાડ પંથકના દૈનિક મુસાફરોમાં આનંદ અને ઉત્સાહનો માહોલ જોવા મળ્યો હતો.