નવસારીના દુધિયા તળાવ શાકભાજી માર્કેટમાં યુરિનલ લીકેજથી ગંદકી

શાક માર્કેટના વેપારીઓ અને ખરીદી કરવા આવતા ગ્રાહકો ત્રસ્ત, મહાપાલિકા તંત્ર સામે રોષ

નવસારી : નવસારી શહેરના દુધિયા તળાવ ખાતે આવેલા શાકભાજી માર્કેટમાં પાવર સ્ટેશનની બાજુમાં આવેલ જાહેર યુરિનલમાંથી બારેમાસ ગંદા અને દુર્ગંધયુક્ત પાણીનું લીકેજ થતું હોવાની ફરિયાદો ઉઠી રહી છે. યુરિનલનું દૂષિત પાણી સીધું શાકભાજીની લારીઓ અને પાથરણાં નજીક ભરાઈ રહેતા વેપારીઓ તેમજ ગ્રાહકોને ભારે હાલાકીનો સામનો કરવો પડી રહ્યો છે.

માર્કેટ વિસ્તારમાં સતત ગંદુ પાણી ભરાઈ રહેતા અસહ્ય દુર્ગંધ ફેલાય છે. શાકભાજી વેચતા નાના વેપારીઓને ગંદકી વચ્ચે બેસીને ધંધો કરવાની ફરજ પડી રહી છે. જ્યારે ખરીદી માટે આવતા ગ્રાહકો પણ દુર્ગંધ અને ગંદકીથી પરેશાન થઈ રહ્યા છે. ગંદકીના કારણે રોગચાળો ફાટી નીકળવાની ભીતિ પણ સ્થાનિકોમાં જોવા મળી રહી છે.

સ્થાનિક વેપારીઓ અને ગ્રાહકોના જણાવ્યા મુજબ, તેઓ નિયમિતપણે ટેક્સ ચૂકવે છે, છતાં સ્વચ્છતા જેવી મૂળભૂત સુવિધા આપવામાં મનપા તંત્ર નિષ્ફળ રહ્યું છે. આ અંગે વારંવાર મૌખિક રજૂઆતો કરવામાં આવી હોવા છતાં સમસ્યાનું કાયમી નિરાકરણ આવ્યું નથી. ગંદકી અને દુર્ગંધ વચ્ચે રહેવું પડે છે તે શરમજનક છે. બારેમાસ લીકેજને કારણે ગંદુ પાણી ભરાઈ રહે છે, જેના કારણે શાકભાજી બગડવાની સાથે લોકોના આરોગ્ય સામે પણ જોખમ ઊભું થાય છે.

ત્યારે મનપા તંત્ર તાત્કાલિક સ્થળનું નિરીક્ષણ કરી યુરિનલનું લીકેજ બંધ કરાવે અને શાકભાજી માર્કેટમાં સ્વચ્છતા જળવાઈ રહે તે માટે કાયમી વ્યવસ્થા કરે તેવી માંગ વેપારીઓ અને ગ્રાહકોમાં ઉઠી છે.