પેરા ગામે ખેડૂત પરિવારને ધમકીભરી ચિઠ્ઠીઓ મોકલી 5થી 10 લાખ રૂપિયાની માંગણી

સમગ્ર પરિવારને નિશાન બનાવવાની ધમકી; બારીનો કાચ તોડવા અને ઘરની પાછળ આગ લગાવવાના બનાવો બાદ નવસારી ગ્રામ્ય પોલીસમાં ફરિયાદ

નવસારી : નવસારી તાલુકાના પેરા ગામના ખેડૂત પરિવારને અજાણ્યા ઈસમો દ્વારા ધમકીભરી ચિઠ્ઠીઓ મોકલી 5થી 10 લાખ રૂપિયાની માંગણી કરવામાં આવી હોવાનો બનાવ નવસારી ગ્રામ્ય પોલીસ મથકે નોંધાયો છે.

પેરા ગામે નારાયણ આશ્રમની બાજુમાં આહીર ફળિયાના પાંચ બંગલામાં દિનેશભાઈ રતનજીભાઈ આહીર (ઉં.વ. 43) પરિવાર સાથે રહે છે. તેઓ ખેતી તથા જમીન દલાલીનું કામ કરી પરિવારનું ગુજરાન ચલાવે છે.

ગત 16મી ઓગસ્ટે દિનેશભાઈની પુત્રીએ તેમને ફોન કરીને જણાવ્યું હતું કે રાત્રે કોઈએ ઘરની પાછળ પથ્થર મારી બારીનો કાચ તોડ્યો છે. આ અંગે ગામના સરપંચને જાણ કરતાં તેમણે પોલીસને બોલાવી હતી. મોડી રાત્રે દિનેશભાઈ ઘરે આવ્યા ત્યારે ઘરની પાછળની દીવાલ પર ગુજરાતી લિપિમાં હિન્દી ભાષાનું ધમકીભર્યું લખાણ જોવા મળ્યું હતું.

ઘરમાં પોતું કરવાના સફેદ રૂમાલ પર પણ ધમકીભર્યું લખાણ લખવામાં આવ્યું હતું. તેમાં બીજા દિવસે સાંજે 7 વાગ્યા સુધીમાં 5 લાખ રૂપિયા આપવાની માંગણી કરવામાં આવી હતી. રૂપિયા નહીં આપે તો પત્ની અને બાળકોને નિશાન બનાવવાની ધમકી અપાઈ હતી. આ ઉપરાંત વિવિધ જગ્યાએથી અન્ય ધમકીભર્યાં લખાણો પણ મળી આવ્યાં હતાં.

ગત 18મી ઓગસ્ટે દિનેશભાઈનાં ભાભી દૂધ લેવા આવતાં હતાં ત્યારે ઘરના આગળના દરવાજા પાસે ગટરની કુંડી નજીક પ્લાસ્ટિકની કોથળીમાં રેતી અને પથ્થર સાથે મૂકેલી એક ચિઠ્ઠી મળી આવી હતી. આ ચિઠ્ઠીમાં પણ ગુજરાતી લિપિમાં હિન્દી ભાષામાં ધમકીઓ આપી 10 લાખ રૂપિયાની માંગણી કરવામાં આવી હતી. ત્યારબાદ દિનેશભાઈએ ઘરની પાછળ સીસીટીવી કેમેરા મુકાવ્યા હતા.

ગત 7મી સપ્ટેમ્બરે ફરી એક અજાણ્યા ઈસમે ઘરની પાછળ કમ્પાઉન્ડની દીવાલ પાસે આવેલા ટ્રેક્ટરની આડશમાં રહી જ્વલનશીલ પદાર્થ છાંટી પ્લાસ્ટિક સળગાવ્યું હતું. ત્યારબાદ તે કાગળની ચિઠ્ઠી મૂકીને નાસી ગયો હતો. સવારે દિનેશભાઈએ સીસીટીવી ફૂટેજ તપાસ્યાં હતાં. ઘટનાસ્થળેથી ફરી ધમકીભર્યું લખાણ અને પૈસાની માંગણી કરતી ચિઠ્ઠી મળી આવી હતી.

ત્યારબાદ ગત 24મી સપ્ટેમ્બરે પણ ઘરની પાછળથી ધમકીભર્યું લખાણ ધરાવતી વધુ એક ચિઠ્ઠી મળી આવી હતી.

આ મામલે દિનેશભાઈએ નવસારી ગ્રામ્ય પોલીસ મથકે અજાણ્યા ઈસમો વિરુદ્ધ ફરિયાદ નોંધાવી છે. આગળની તપાસ પી.એસ.આઈ. એમ.એલ. સૈયદે હાથ ધરી છે.