પિંપરી સરકારી આશ્રમ શાળાના કુમાર અને કન્યા છાત્રાલયના નવા બિલ્ડીંગનું ખાતમુહૂર્ત

દક્ષિણ ગુજરાત વીજ કંપની લિમિટેડના CSR ફંડમાંથી ₹2.43 કરોડના ખર્ચે બે નવા છાત્રાલયોના નિર્માણનો પ્રારંભ

ડાંગ : દેશના વડાપ્રધાનના જન્મદિવસ નિમિત્તે સેવા સમર્પણના 25 વર્ષની ઉજવણી અંતર્ગત પિંપરી ખાતે સરકારી આશ્રમ શાળાના કુમાર અને કન્યા છાત્રાલયના નવા બિલ્ડીંગનું ખાતમુહૂર્ત અને ભૂમિપૂજન કરવામાં આવ્યું હતું. કાર્યક્રમ ગુજરાત વિધાનસભાના નાયબ મુખ્ય દંડક અને ડાંગના ધારાસભ્ય વિજયભાઈ પટેલ તેમજ જિલ્લા કલેક્ટર એન. ડી. પરમારની ઉપસ્થિતિમાં યોજાયો હતો.

દક્ષિણ ગુજરાત વીજ કંપની લિમિટેડના કોર્પોરેટ સોશિયલ રિસ્પોન્સિબિલિટી ફંડમાંથી કુલ ₹2 કરોડ 43 લાખના ખર્ચે બંને છાત્રાલયોના નિર્માણને મંજૂરી આપવામાં આવી છે. આ પ્રસંગે વિજયભાઈ પટેલે ડીજીવીસીએલ અને જેટકોનો આભાર વ્યક્ત કર્યો હતો.

તેમણે જણાવ્યું હતું કે, તત્કાલીન મુખ્યમંત્રી નરેન્દ્રભાઈ મોદીના સમયમાં જ્યોતિગ્રામ યોજનાની શરૂઆત ડાંગ જિલ્લામાંથી કરવામાં આવી હતી, જેના પરિણામે જિલ્લામાં 24 કલાક વીજ પુરવઠાની સુવિધા શરૂ થઈ હતી. તેમણે ‘આશીર્વાદ કા દિયા’ કાર્યક્રમમાં સૌને સહભાગી બની દીવા પ્રજ્વલિત કરવા પણ આહવાન કર્યું હતું.

જિલ્લા પંચાયત પ્રમુખ રાજેશભાઈ ગામિતે ગુણવત્તાસભર શિક્ષણના મહત્વ પર ભાર મૂકતા જણાવ્યું હતું કે સારું શિક્ષણ વ્યક્તિના જીવનની સાથે રાષ્ટ્રના વિકાસ માટે પણ મહત્વપૂર્ણ છે. તેમણે શાળા પ્રવેશોત્સવ સહિત સરકાર દ્વારા અમલમાં મુકાયેલી વિવિધ શૈક્ષણિક યોજનાઓનો ઉલ્લેખ કરી વિદ્યાર્થીઓને ઉચ્ચ શિક્ષણ મેળવવા પ્રોત્સાહિત કર્યા હતા.

કાર્યક્રમ બાદ મહાનુભાવોએ શાળા પરિસરમાં વૃક્ષારોપણ કર્યું હતું. પિંપરી પ્રાથમિક શાળા અને મુખ્ય બજાર વિસ્તારમાં સફાઈ અભિયાન પણ હાથ ધરાયું હતું. જિલ્લા કલેક્ટર એન. ડી. પરમારે જાતે ઝાડું પકડી સફાઈ કરી ગ્રામજનોને સ્વચ્છતા જાળવવા અપીલ કરી હતી.

જિલ્લા કલેક્ટરે પ્રાથમિક શાળાની મુલાકાત લઈ ભૌતિક સુવિધાઓની માહિતી મેળવી અને શાળા પરિસરમાં સ્વચ્છતા જાળવવા સૂચના આપી હતી.

આ પ્રસંગે જિલ્લા શિક્ષણ અધિકારી જીગ્નેશ ત્રિવેદી, ડીજીવીસીએલના અધિકારીઓ, સ્થાનિક આગેવાનો, સરપંચો, તાલુકા સદસ્યો તેમજ મોટી સંખ્યામાં ગ્રામજનો અને વિદ્યાર્થીઓ ઉપસ્થિત રહ્યા હતા.