ઉમરગામમાં સંસ્કૃત સપ્તાહની ભવ્ય રેલી

નવસારી : ઉમરગામની એમ.એમ. હાઈસ્કૂલ ખાતે સંસ્કૃત સપ્તાહની ઉજવણી અંતર્ગત ભવ્ય રેલી યોજાઈ હતી.

ધારાસભ્ય રમણભાઈ પાટકરની વિશેષ ઉપસ્થિતિમાં યોજાયેલી રેલીનો મુખ્ય હેતુ સંસ્કૃત ભાષાનો પ્રચાર-પ્રસાર અને વિદ્યાર્થીઓમાં સંસ્કૃત પ્રત્યે રસ વધારવાનો હતો.

રેલીમાં મોટી સંખ્યામાં વિદ્યાર્થીઓએ ભાગ લીધો હતો. વિદ્યાર્થીઓએ સંસ્કૃત ભાષાના મહત્વ અંગે સૂત્રોચ્ચાર કર્યા હતા. જ્યારે ઋષિ-મુનિઓની વેશભૂષામાં આવેલા વિદ્યાર્થીઓ આકર્ષણનું કેન્દ્ર બન્યા હતા.

આ રેલી એમ.એમ. હાઈસ્કૂલથી શરૂ થઈ ઉમરગામ નગરપાલિકા કચેરી સહિત શહેરના વિવિધ વિસ્તારોમાં ફરી હતી.

આ પ્રસંગે નગરપાલિકા પ્રમુખ ખુશ્બુબેન જાદવ, શહેર ભાજપ પ્રમુખ મયંકભાઈ પ્રેસવાલા, ઈશ્વરભાઈ બારી સહિત હોદ્દેદારો, શિક્ષકો અને મોટી સંખ્યામાં વિદ્યાર્થીઓ ઉપસ્થિત રહ્યા હતા.

ધારાસભ્ય રમણભાઈ પાટકરે સંસ્કૃત શિક્ષકો સાથે સંવાદ કરી વિદ્યાર્થીઓમાં સંસ્કૃત પ્રત્યેની રુચિ અને સંસ્કૃત શિક્ષણ અંગે માહિતી મેળવી હતી.

રેલી દ્વારા સંદેશ આપવામાં આવ્યો કે સંસ્કૃત માત્ર ભૂતકાળની ધરોહર નહીં, પરંતુ નવી પેઢી સુધી પહોંચાડવાની જીવંત ભાષા છે.