વિજલપોરમાં આશાપુરી-સુશ્રુષા હોસ્પિટલના રસ્તા પરની ડ્રેનેજ ઉભરાતા સ્થાનિકો પરેશાન

રસ્તા પર ગંદુ પાણી ફરી વળતા વાહનચાલકો અને રાહદારીઓને હાલાકી, સ્થાનિકોની કાયમી ઉકેલની માંગ

નવસારી : વિજલપોરના આશાપુરી-સુશ્રુષા હોસ્પિટલ સુધીના મુખ્ય રસ્તા પરની ડ્રેનેજ બ્લોક થવાના કારણે ઉભરાઈ હતી. જે ડ્રેનેજનું ગંદુ પાણી રસ્તા પર ફરી વળતા વાહન ચાલકો અને રાહદારી સહીત સ્થાનિકોને દુર્ગંધનો સામનો કરવો પડ્યો હતો.

વિજલપોરમાં આશાપુરી માતાના મંદિરથી લઇ સુશ્રુષા હોસ્પિટલ સુધીનો રસ્તો સતત વાહનવ્યવહારથી ધમધમતો હોય છે. આ રસ્તો નવસારી શહેરને જોડતો હોવાથી રોજ હજારો નાના-મોટા વાહનો તેમજ રાહદારીઓ પસાર થાય છે. આ રસ્તા પર ડ્રેનેજની ચેમ્બરો પણ આવી છે. જેથી ઘણી વખત ડ્રેનેજ લાઈન બ્લોક થવાના કારણે ડ્રેનેજનું ગંદુ પાણી રસ્તા ઉપર ફરી વળતા લોકોને ભારે હાલાકીનો સામનો કરવો પડે છે.

ગત શનિવારે આશાપુરી-સુશ્રુષા રસ્તા પર આવેલી ડ્રેનેજો બ્લોક થઇ જવાના કારણે ઉભરાઈ હતી. જેના કારણે ડ્રેનેજનું દુષિત પાણી રસ્તા ફરી વળતા વાહનચાલકો તેમજ રાહદારીઓને દુર્ગંધનો સામનો કરવો પડ્યો હતો. રસ્તાની એક તરફ પાણી ભરાઈ જતા વાહનચાલકોને પાણીમાંથી પસાર થવાની ફરજ પડી હતી.

સ્થાનિક સ્તરે મળતી માહિતી મુજબ, ડ્રેનેજ લાઇન ચોકઅપ થવાના કારણે ચેમ્બરમાંથી ગંદુ પાણી બહાર આવ્યું હતું. ડ્રેનેજ ચેમ્બર ઉભરાવાની સમસ્યાને કારણે થોડા સમય માટે માર્ગ પર ગંદા પાણીનો ભરાવો રહ્યો હતો. જેના પગલે સ્થાનિકોમાં પણ તંત્રની કામગીરી સામે નારાજગી જોવા મળી હતી.

જોકે ઘટનાની જાણ થતાં મનપા તંત્રના કર્મચારીઓ દ્વારા સ્થળ પર પહોંચી ડ્રેનેજની સમસ્યા દૂર કરવા કામગીરી હાથ ધરવામાં આવી હતી. ડ્રેનેજ લાઇન સાફ કરવાની કામગીરી બાદ પાણીનો નિકાલ થતાં રસ્તાની સ્થિતિ ધીમે ધીમે સામાન્ય બની હતી. ત્યારે મુખ્ય રસ્તા પર વારંવાર ડ્રેનેજ બ્લોક થવાની સમસ્યાનો કાયમી ઉકેલ લાવવાની જરૂરિયાત સ્થાનિકો દ્વારા વ્યક્ત કરવામાં આવી રહી છે.