વલસાડનો ઓવરબ્રિજ બન્યો વિજ્ઞાન ગેલેરી, મહાન વૈજ્ઞાનિકોના ભીંતચિત્રોથી રાષ્ટ્રગૌરવની અનોખી ઝલક

વલસાડનો ઓવરબ્રિજ બન્યો વિજ્ઞાન ગેલેરી, મહાન વૈજ્ઞાનિકોના ભીંતચિત્રોથી રાષ્ટ્રગૌરવની અનોખી ઝલક

વલસાડ : વલસાડની ઓળખ સમાન બનેલા નવા બનેલા ઓવરબ્રિજને તત્કાલિક કલેકટર ભવ્ય વર્માએ માત્ર વાહનવ્યવહારની સુવિધા પૂરતો સીમિત ન રાખી, તેને જ્ઞાન, વિજ્ઞાન અને રાષ્ટ્રગૌરવ સાથે જોડવાની પ્રેરણા આપી હતી. તેમના આ વિચારને વર્તમાન કલેકટર નીતિન સાંગવાને આગળ ધપાવી તેમના માર્ગદર્શન હેઠળ આર એન્ડ બી (સ્ટેટ)ના આ ઓવરબ્રિજના પિલરો પર દક્ષિણ ગુજરાત વીજ કંપની (બાંધકામ) દ્વારા સીએસઆર ફંડમાંથી ભારતના મહાન વૈજ્ઞાનિકોના ભવ્ય ભીંતચિત્રો દોરવામાં આવ્યા છે જે આકર્ષણનું કેન્દ્ર બન્યા છે. આ સાથે તેની બાજુની દિવાલો પર વિજ્ઞાન, નવીનતા, સંશોધન અને દેશપ્રેમને ઉજાગર કરતા ચિત્રો પણ જોવા મળી રહ્યા છે જેને કારણે દરેક વલસાડવાસીને પોતાનું વલસાડ શહેર સુંદર અને સોહામણુ લાગી રહ્યું છે.

ઓવરબ્રિજના પિલરો પર ભારતીય પરમાણુ પ્રોગ્રામના સ્થાપક ડૉ. હોમી ભાભા, ભારતના પૂર્વ રાષ્ટ્રપતિ ડૉ. એ.પી.જે. અબ્દુલ કલામ, નોબેલ પુરસ્કાર મેળવનાર ભૌતિકશાસ્ત્રી સર સી. વી. રામન, ભારતીય અવકાશ કાર્યક્રમના પિતા ડૉ. વિક્રમ સારાભાઈ, ભૌતિકશાસ્ત્રનો નોબેલ પુરસ્કાર મેળવનાર સુબ્રહ્મણ્યમ ચંદ્રશેખર અને ભૌતિકશાસ્ત્રી અને વનસ્પતિશાસ્ત્રી જગદીશચંદ્ર બોઝ જેવા ભારતના મહાન વૈજ્ઞાનિકોના ચિત્રો રજૂ કરવામાં આવ્યા છે. આ મહાનુભાવોએ પોતાના જ્ઞાન, સંશોધન અને અવિરત મહેનતથી માત્ર ભારતનું નામ જ રોશન નથી કર્યું, પરંતુ સમગ્ર વિશ્વમાં ભારતની વૈજ્ઞાનિક ક્ષમતાની આગવી ઓળખ ઊભી કરી છે.

આ ભીંતચિત્રો રસ્તા પરથી પસાર થતા લોકો માટે માત્ર સુંદરતાનો અનુભવ કરાવવા માટે નથી, પરંતુ એક મૌન સંદેશ જે દેશના વૈજ્ઞાનિકોએ વિશ્વમાં ભારતનું નામ ગૌરવવંતુ કર્યું, તેમની ઓળખ અને યોગદાનને આપણે જાણીએ અને નવી પેઢી સુધી પહોંચાડીએ. આપવા માટે પણ છે. ખાસ કરીને બાળકો અને યુવાનો માટે આ ઓવરબ્રિજ એક ખુલ્લી વિજ્ઞાન ગેલેરી સમાન બની છે.

રોજિંદા કાર્યો માટે પસાર થતી વખતે જ્યારે તેમની નજર આ મહાન વૈજ્ઞાનિકોના ચહેરા અને તેમની સાથે જોડાયેલા વૈજ્ઞાનિક વિચારો પર પડે, ત્યારે તેમના મનમાં જિજ્ઞાસા જન્મી શકે છે. આ વ્યક્તિ કોણ હતા? તેમણે ભારત માટે શું કર્યું? અને હું દેશ માટે શું કરી શકું? ઓવરબ્રિજની બાજુની દિવાલો પર દર્શાવવામાં આવેલા વિજ્ઞાન અને નવીનતાના દ્રશ્યો આ વિચારને વધુ મજબૂત બનાવે છે. તેમાં રહેલો દેશપ્રેમનો ભાવ નવી પેઢીને સંશોધન, સર્જનાત્મકતા અને રાષ્ટ્રનિર્માણ તરફ પ્રેરિત કરી શકે છે.

વિકાસ માત્ર રસ્તા, પુલ અને ઇમારતોના નિર્માણથી થતો નથી, પરંતુ વિકાસ ત્યારે જ અર્થપૂર્ણ બને છે જ્યારે તેની સાથે સમાજમાં જ્ઞાન અને જાગૃતિનો પણ વિકાસ થાય. વલસાડનો આ ઓવરબ્રિજ એ દિશામાં એક સુંદર અને પ્રશંસનીય પહેલ બની રહ્યો છે.

આજે અહીંથી પસાર થતો દરેક નાગરિક કદાચ થોડી ક્ષણ માટે આ મહાન વૈજ્ઞાનિકોને જોશે, પરંતુ જો એ નજરમાંથી એક બાળકને પ્રેરણા મળે, કોઈ યુવાનમાં વિજ્ઞાન પ્રત્યે રસ જાગે કે કોઈ વ્યક્તિને ભારતના વૈજ્ઞાનિક વારસાની જાણકારી મળે તો આ ઓવરબ્રિજનું સૌંદર્ય તેના હેતુને સાચા અર્થમાં સાર્થક કરશે. આ માત્ર ઓવરબ્રિજ નથી, આ ભારતના વૈજ્ઞાનિક ગૌરવ, નવીનતા અને રાષ્ટ્રપ્રેમની જીવંત પાઠશાળા છે.