ભક્તાશ્રમ શાળાનું શિક્ષકદિને સન્માન કરાયું

100 ટકા પરિણામ બદલ શાળાને સન્માન; સંસ્કૃત વિષયમાં 100 ટકા પરિણામ મેળવનાર શિક્ષિકા મમતાબેન પટેલનું પણ અભિવાદન

નવસારી : 5મી સપ્ટેમ્બરે ગુજરાત રાજ્ય શિક્ષણ વિભાગ તથા જિલ્લા શિક્ષણ અધિકારી કચેરી દ્વારા આયોજિત કાર્યક્રમમાં ઉચ્ચતર માધ્યમિક શાળા આશ્રમશાળા ભક્તાશ્રમને 100 ટકા પરિણામ બદલ સન્માનિત કરવામાં આવી હતી.

કાર્યક્રમમાં કેબિનેટ મંત્રી અને ગણદેવીના ધારાસભ્ય નરેશભાઈ પટેલ, નવસારીના ધારાસભ્ય રાકેશભાઈ દેસાઈ, જિલ્લા પંચાયત પ્રમુખ, જિલ્લા શિક્ષણાધિકારી જયેશભાઈ ચૌધરી તથા ડાયેટ પ્રાચાર્ય યોગેશભાઈની ઉપસ્થિતિ રહી હતી.

શાળાના માધ્યમિક વિભાગમાં સંસ્કૃત વિષયમાં 100 ટકા પરિણામ મેળવનાર મમતાબેન પી. પટેલનું પ્રમાણપત્ર આપી અભિવાદન કરવામાં આવ્યું હતું.

શાળા સંચાલક મંડળના પ્રમુખ ભાસ્કરભાઈ ભક્ત, મંત્રી નિરવભાઈ ભક્ત, મિતેશભાઈ ભક્ત તથા કેમ્પસ ડિરેક્ટર ડો. ધર્મેશભાઈ કાપડિયાએ ઉત્કૃષ્ટ પરિણામ બદલ આચાર્યો પરિમલભાઈ, મયુરીબેન, જાગૃતીબેન, અંકિતભાઈ, પ્રશાંતભાઈ, નમ્રતાબેન, દિવ્યાંગીબેન તેમજ તમામ નોન-ટીચિંગ સ્ટાફને અભિનંદન પાઠવ્યા હતા.

શાળામાં વિદ્યાર્થીઓએ પણ સ્વયં શિક્ષક દિનની ઉજવણી ઉત્સાહપૂર્વક કરી હતી. વિદ્યાર્થીઓએ વિવિધ વિષય શિક્ષકો, આચાર્ય, વહીવટી સ્ટાફ તેમજ સેવક ભાઈ-બહેનની ભૂમિકા ભજવી સમગ્ર દિવસને યાદગાર બનાવ્યો હતો.