નવસારીના નાયબ કાર્યપાલક ઈજનેર અને મદદનીશ ઈજનેર ₹40 હજારની લાંચ લેતા ઝડપાયા

કમ્પાઉન્ડ દિવાલના બિલના નાણાં મંજૂર કરવા ₹50 હજારની માંગણી; રકઝક બાદ ₹40 હજારમાં સોદો નક્કી થયો હોવાનો આક્ષેપ

નવસારી : નવસારીના નાયબ કાર્યપાલક ઈજનેર અને કરાર આધારિત મદદનીશ ઈજનેરને ₹40 હજારની લાંચ લેવાના કેસમાં એસીબી પોલીસે ઝડપી આગળની કાર્યવાહી હાથ ધરી છે.

મળતી માહિતી મુજબ, એક જાગૃત નાગરિકે સરકારી ટેન્ડર અંતર્ગત કમ્પાઉન્ડ દિવાલનું કામ પૂર્ણ કર્યું હતું. આ કામનું બિલ ગુજરાત રાજ્ય પોલીસ આવાસ નિગમ લિમિટેડના નાયબ કાર્યપાલક ઈજનેર બ્રિજેશભાઈ રમેશભાઈ ગોંડલીયા અને કરાર આધારિત મદદનીશ ઈજનેર નયનભાઈ રાજાભાઈ બલદાણિયાને રજૂ કરવામાં આવ્યું હતું.

આક્ષેપ મુજબ, બિલના નાણાં મંજૂર કરવાની કાર્યવાહી માટે જાગૃત નાગરિક પાસેથી ₹50 હજારની લાંચ માંગવામાં આવી હતી. બાદમાં રકઝક થતાં રકમ ₹40 હજાર નક્કી થઈ હતી. જોકે, ફરિયાદી લાંચ આપવા ઇચ્છતા ન હોવાથી તેમણે એસીબીનો સંપર્ક કર્યો હતો.

એસીબી પોલીસે ફરિયાદના આધારે લાંચનું છટકું ગોઠવ્યું હતું. સુરત નર્મદનગર સોસાયટી સામે ગુજરાત રાજ્ય પોલીસ આવાસ નિગમ લિમિટેડની કાર્યપાલક ઈજનેરની કચેરી નજીક નાયબ કાર્યપાલક ઈજનેર બ્રિજેશભાઈ ગોંડલીયા અને મદદનીશ ઈજનેર નયનભાઈ બલદાણિયા ફરિયાદીને મળ્યા હતા.

એસીબીના જણાવ્યા મુજબ, નયનભાઈએ ₹40 હજારની લાંચની રકમ માગી હતી. ફરિયાદીએ રકમ આપતાં જ એસીબીની ટીમે કાર્યવાહી કરીને નયનભાઈને રંગેહાથ ઝડપી પાડ્યા હતા.

ત્યારબાદ કેસની વધુ તપાસ દરમિયાન નાયબ કાર્યપાલક ઈજનેર બ્રિજેશભાઈ ગોંડલીયાને પણ ઝડપી લેવામાં આવ્યા હતા. બંને સામે એસીબી દ્વારા આગળની કાયદેસરની કાર્યવાહી હાથ ધરવામાં આવી છે.