પોલીસની ખોટી ઓળખ આપી સોનાના દાગીનાની ઠગાઈ કરતી ઈરાની ગેંગનો સભ્ય મહારાષ્ટ્રથી ઝડપાયો

સીનીયર સીટીઝનોને ટાર્ગેટ કરી પોલીસ બની દાગીના પડાવતી ગેંગ; ₹3.57 લાખની ઠગાઈના કેસમાં એક આરોપી ઝડપાયો, બે વોન્ટેડ

નવસારી : સીનીયર સીટીઝનોને ટાર્ગેટ કરી પોલીસ તરીકેની ખોટી ઓળખ આપી સોનાના દાગીનાની ઠગાઈ કરતી કુખ્યાત ઈરાની ગેંગના એક આરોપીને બીલીમોરા પોલીસે મહારાષ્ટ્રથી ઝડપી પાડી આગળની કાર્યવાહી હાથ ધરી છે.

મળતી માહિતી મુજબ, ગત 9મીએ બીલીમોરા-અમલસાડ રોડ પર સ્મશાન ભૂમિ સામે ત્રણ અજાણ્યા ઇસમો વગર નંબરની બજાજ પલ્સર અને સુઝુકી બર્ગમેન પર આવ્યા હતા. તેમણે એક આધેડને પોલીસ તરીકેની ઓળખ આપી લાયસન્સ માંગ્યું હતું અને વિસ્તારમાં ચોરીના બનાવો વધી રહ્યા હોવાનું જણાવી સાવચેત રહેવા કહ્યું હતું.

આ દરમિયાન આધેડના હાથમાં રહેલું સોનાનું બ્રેસલેટ અને ગળાની સોનાની ચેઈન, જેની કુલ કિંમત અંદાજે ₹3.57 લાખ હતી, ઉતરાવી પ્રથમ ખિસ્સામાં મુકાવ્યા અને બાદમાં કાગળમાં મુકવાનું જણાવ્યું હતું. ત્રણમાંથી એક ઇસમે કાગળ આપીને તેમાં દાગીના મુકાવ્યા બાદ આધેડની નજર ચૂકવી કાંકરા ભરેલો બીજો કાગળ આપી સોનાના દાગીના લઈને નાસી ગયા હતા.

આ બનાવ અંગે બીલીમોરા પોલીસ મથકે ફરિયાદ નોંધાયા બાદ પોલીસે CCTV ફૂટેજ, ટેકનિકલ એનાલિસિસ અને હ્યુમન ઇન્ટેલિજન્સના આધારે તપાસ શરૂ કરી હતી. નેશનલ હાઈવે નં. 48 પર ગુજરાત-મહારાષ્ટ્ર બોર્ડર વિસ્તારમાં આરોપીઓ અંગે વોચ ગોઠવવામાં આવી હતી.

તપાસ દરમિયાન સુઝુકી બર્ગમેન નં. MH-02-GU-8722 સાથે મહારાષ્ટ્રના થાણે જિલ્લાના કલ્યાણ, આમ્બેવલી ઇન્દિરાનગર રેલવે સ્ટેશન નજીક રહેતા અસદઉલ્લા ફૈયાઝ ખાનને વલસાડ LCB અને મહારાષ્ટ્ર પોલીસના સંકલનથી ચારોટી ટોલનાકા નજીકથી ઝડપી પાડવામાં આવ્યો હતો.

પોલીસે મમુ સંજય ઈરાની અને તનવીર ઈરાનીને વોન્ટેડ જાહેર કર્યા છે. આરોપી અસદઉલ્લાની ધરપકડથી બીલીમોરા તેમજ મહારાષ્ટ્રના વિઠલવાડી પોલીસ મથકના ગુનાઓનો પણ ભેદ ઉકેલાયો હોવાનું પોલીસે જણાવ્યું છે.

આરોપી અસદઉલ્લા ફૈયાઝ ખાન સામે અગાઉ પણ મહારાષ્ટ્રના વિવિધ પોલીસ મથકોમાં ગુનાઓ નોંધાયેલા હોવાનું તપાસમાં સામે આવ્યું છે. જેમાં અંબાલા સિટી, ડોંડાઇચા, નંદુરબાર, ઉપનગર, દેવપુર, ચાલીસગાંવ, ખડકપાડા, વાશી અને નવઘર પોલીસ મથકના કેસોનો સમાવેશ થાય છે.